మురసు తుపానుపై ముందస్తు చర్యలకు అధికారులకు పవన్‌ ఆదేశాలు

మురసు తుపాను నేపథ్యంలో డిప్యూటీ సీఎం పవన్‌ కళ్యాణ్ సంబంధిత శాఖల అధికారులతో సమీక్ష నిర్వహించారు. పంచాయతీరాజ్‌, గ్రామీణాభివృద్ధి, గ్రామీణ నీటి సరఫరా శాఖల అధికారులతో పరిస్థితిని సమీక్షించారు. శ్రీపొట్టి శ్రీరాములు నెల్లూరు, ప్రకాశం, బాపట్ల, కృష్ణా జిల్లాలపై తుపాను తీవ్ర ప్రభావం చూపే అవకాశం ఉందని పేర్కొంటూ అధికారులు అప్రమత్తంగా ఉండాలని ఆదేశించారు.

అత్యంత భారీ వర్షాల హెచ్చరికలు ఉన్న ప్రాంతాల ప్రజలను ముందుగానే అప్రమత్తం చేయాలని, లోతట్టు ప్రాంతాల వారిని సురక్షిత ప్రాంతాలకు తరలించాలని పవన్‌ సూచించారు. వాగులు, వంకల సమీపంలోకి ప్రజలు వెళ్లకుండా చర్యలు తీసుకోవాలన్నారు. తాగునీరు, విద్యుత్‌ సరఫరాలో అంతరాయాలు ఏర్పడితే వీలైనంత త్వరగా పునరుద్ధరించేలా సమన్వయం చేసుకోవాలని అధికారులకు దిశానిర్దేశం చేశారు. తుపాను ప్రభావం పూర్తిగా తగ్గే వరకు ప్రజలు సురక్షిత ప్రాంతాల్లోనే ఉండాలని విజ్ఞప్తి చేశారు.