నాంపల్లి కోర్టుకు సీఎం రేవంత్ రెడ్డి.. కోవిడ్ కేసులో విచారణ

తెలంగాణ ముఖ్యమంత్రి రేవంత్ రెడ్డి నాంపల్లిలోని ప్రజాప్రతినిధుల ప్రత్యేక కోర్టుకు స్వయంగా హాజరయ్యారు. 2026 నవంబర్ 12న మధ్యాహ్నం కోర్టులో జరిగిన విచారణకు ఆయన హాజరయ్యారు. 2021లో నాగార్జునసాగర్ ఉప ఎన్నికల ప్రచార సమయంలో కోవిడ్ నిబంధనలు ఉల్లంఘించారనే ఆరోపణలపై అప్పటి బీఆర్ఎస్ ప్రభుత్వ హయాంలో రేవంత్ రెడ్డిపై పోలీసులు కేసు నమోదు చేశారు. ఈ కేసు విచారణలో భాగంగానే ఆయన కోర్టుకు వెళ్లారు.

2021 ఏప్రిల్ 11న నల్గొండ జిల్లా పెద్దవూర మండలం చలకుర్తి గ్రామంలో నాగార్జునసాగర్ ఉప ఎన్నికల ప్రచారం జరిగింది. అప్పట్లో తెలంగాణ పీసీసీ అధ్యక్షుడిగా ఉన్న రేవంత్ రెడ్డితో పాటు కాంగ్రెస్ నాయకులు, కార్యకర్తలు ప్రచారంలో పాల్గొన్నారు. ఈ సందర్భంగా మాస్కులు ధరించకుండా, కోవిడ్ నిబంధనలకు అనుగుణంగా జాగ్రత్తలు తీసుకోలేదనే ఆరోపణలతో పోలీసులు ఎఫ్‌ఐఆర్ నమోదు చేశారు. ఈ కేసులో క్రిమినల్ ప్రొసీజర్ కోడ్ (సీఆర్‌పీసీ) సెక్షన్ 313 కింద నిందితుల వాంగ్మూలాలను నమోదు చేసే ప్రక్రియలో భాగంగా సీఎం రేవంత్ రెడ్డి వ్యక్తిగతంగా కోర్టుకు హాజరయ్యారు.