ఉక్రెయిన్ రైల్వే స్టేషన్‌పై రష్యా డ్రోన్ దాడి.. పలువురు మృతి

మధ్య ఉక్రెయిన్‌లోని డ్నిప్రో నగర ప్రధాన రైల్వే స్టేషన్‌పై రష్యా డ్రోన్ దాడి చేయడంతో తీవ్ర విషాదం చోటుచేసుకుంది. స్టేషన్‌లోని ప్లాట్‌ఫామ్‌పై ఆగి ఉన్న రైలును లక్ష్యంగా చేసుకుని జరిగిన ఈ దాడిలో కనీసం 13 మంది మరణించినట్లు ఉక్రెయిన్ అధికారులు వెల్లడించారు. ప్రయాణికులు రైలు ఎక్కేందుకు సిద్ధమవుతున్న సమయంలో ఈ ఘటన జరిగినట్లు సమాచారం. మరోవైపు, రెండు రైళ్లపై దాడి జరిగినట్లు వార్తలు వెలువడ్డాయి. ఈ ఘటనలో పలువురు గాయపడగా, బాధితులకు వైద్య సహాయం అందించేందుకు అత్యవసర సిబ్బంది ఘటనా స్థలానికి చేరుకున్నారు.

దాడి జరిగిన సమయంలో స్టేషన్‌లో ప్రయాణికులు పెద్ద సంఖ్యలో ఉన్నట్లు ఉక్రెయిన్ రైల్వే అధికారులు తెలిపారు. ముందుగానే ప్రమాద హెచ్చరిక జారీ చేసినప్పటికీ, ప్లాట్‌ఫామ్‌పై ప్రజలు ఉండటంతో ప్రాణనష్టం సంభవించినట్లు పేర్కొన్నారు. గాయపడిన వారిని ఆసుపత్రులకు తరలించి చికిత్స అందిస్తున్నారు. ఈ దాడిని ఉక్రెయిన్ అధ్యక్షుడు వొలోడిమిర్‌ జెలెన్‌స్కీ తీవ్రంగా ఖండించారు. రైల్వే వ్యవస్థపై వరుస దాడులు జరుగుతున్న నేపథ్యంలో ప్రయాణికుల భద్రతపై ఆందోళనలు వ్యక్తమవుతున్నాయి.