మల్లన్నసాగర్‌ కట్ట పక్కన బ్లాస్టింగ్‌లు.. కాంగ్రెస్‌ ప్రభుత్వంపై హరీశ్‌రావు ఫైర్‌

మల్లన్నసాగర్‌ రిజర్వాయర్‌ భద్రతపై కాంగ్రెస్‌ ప్రభుత్వానికి పట్టింపు లేదా అని బీఆర్‌ఎస్‌ శాసనసభాపక్ష ఉపనేత హరీశ్‌రావు ప్రశ్నించారు. లక్షలాది మంది రైతులకు ప్రయోజనం చేకూర్చడంతో పాటు ఉత్తర తెలంగాణ ప్రజల దాహార్తిని తీర్చేందుకు కోట్లాది రూపాయలతో నిర్మించిన మల్లన్నసాగర్‌ రిజర్వాయర్‌ కట్ట సమీపంలో ఎలాంటి అనుమతులు లేకుండా భారీ బ్లాస్టింగ్‌లు ఎలా నిర్వహిస్తారని ఆయన ఆగ్రహం వ్యక్తం చేశారు. గురువారం సిద్దిపేట జిల్లా కుకునూరుపల్లి మండలం తిప్పారం గ్రామంలోని మల్లన్నసాగర్‌ రిజర్వాయర్‌ కట్టను సందర్శించిన హరీశ్‌రావు, అనంతరం పైప్‌లైన్ల కోసం నిర్మిస్తున్న ఇంటెక్‌వెల్‌ను పరిశీలించారు. ఈ సందర్భంగా ఆయన మీడియాతో మాట్లాడుతూ, కట్టకు సమీపంలో పెద్దపెద్ద గోతులు తవ్వి పేలుళ్లు జరుపుతున్నా ప్రభుత్వం ఎందుకు స్పందించడం లేదని నిలదీశారు.

మేడిగడ్డ ప్రాజెక్టు తరహాలోనే మల్లన్నసాగర్‌ కట్టను కూడా బలహీనపరిచి ప్రాజెక్టును దెబ్బతీసే ప్రయత్నాలు జరుగుతున్నాయా అని హరీశ్‌రావు అనుమానం వ్యక్తం చేశారు. బ్లాస్టింగ్‌ల వల్ల రిజర్వాయర్‌ కట్టకు నష్టం జరిగితే బాధ్యత ఎవరు వహిస్తారని ప్రశ్నించారు. ఈ వ్యవహారంపై ప్రభుత్వం వెంటనే స్పందించి, అనుమతులు లేని బ్లాస్టింగ్‌ పనులను నిలిపివేయడంతో పాటు బాధ్యులపై కఠిన చర్యలు తీసుకోవాలని డిమాండ్‌ చేశారు. రాజకీయ కక్షసాధింపుల కోసం రైతుల భవిష్యత్తును, ప్రజల ప్రాణాలను ప్రమాదంలోకి నెట్టవద్దని హెచ్చరించారు. ప్రభుత్వం తక్షణమే చర్యలు తీసుకోకపోతే రైతులు, ప్రజలను ఏకం చేసి బీఆర్‌ఎస్‌ ఆధ్వర్యంలో పెద్ద ఎత్తున ఆందోళనలు చేపడతామని స్పష్టం చేశారు. ఈ పర్యటనలో ఎమ్మెల్యే కొత్త ప్రభాకర్‌రెడ్డి, ఎమ్మెల్సీ యాదవరెడ్డి, బీఆర్‌ఎస్‌ నేతలు వంటేరు ప్రతాప్‌రెడ్డి, ఎర్రోళ్ల శ్రీనివాస్‌ తదితరులు పాల్గొన్నారు.