సోహ్రాబుద్దీన్ కేసు: సుప్రీంకోర్టు పరిశీలనను స్వాగతించిన కే. నారాయణ..

2005 నాటి సోహ్రాబుద్దీన్ షేక్‌ ఆరోపిత ఎన్‌కౌంటర్ కేసులో 22 మంది నిందితుల నిర్దోషిత్వంపై సుప్రీంకోర్టు పరిశీలనకు అంగీకరించడాన్ని సీపీఐ నేత కే. నారాయణ స్వాగతించారు. బాంబే హైకోర్టు తీర్పును సవాల్‌ చేస్తూ దాఖలైన పిటిషన్‌పై సుప్రీంకోర్టు 22 మంది నిర్దోషులుగా విడుదలైన నిందితులు, సీబీఐకి నోటీసులు జారీ చేసింది. విచారణ సమయంలో 92 మంది సాక్షులు వెనక్కి తగ్గడంపై కోర్టు ఆందోళన వ్యక్తం చేసింది. అయితే కేంద్ర హోంమంత్రి అమిత్‌ షా గతంలో పొందిన డిశ్చార్జ్‌ను తిరిగి పరిశీలించబోమని స్పష్టం చేసింది.

సోహ్రాబుద్దీన్ షేక్‌, ఆయన భార్య కౌసర్‌ బీ, సన్నిహితుడు తులసీరాం ప్రజాపతి మరణాలు అప్పట్లో తీవ్ర న్యాయ, ప్రజా చర్చకు దారితీశాయని నారాయణ పేర్కొన్నారు. ఈ కేసును విచారిస్తున్న సమయంలో జస్టిస్‌ బి.హెచ్. లోయా మరణించిన విషయాన్ని కూడా ఆయన ప్రస్తావించారు. అమిత్‌ షా డిశ్చార్జ్‌కు సంబంధించిన న్యాయ ప్రక్రియ, జస్టిస్‌ లోయా మరణానికి సంబంధించిన అంశాలు, ఇతర నిందితులకు సంబంధించిన కేసులను చట్టపరంగా సాధ్యమైన పరిధిలో పరిశీలించాలని సుప్రీంకోర్టును కోరారు. సున్నితమైన కేసులను విచారించే న్యాయమూర్తులకు ప్రత్యేక భద్రత కల్పించి, ఎలాంటి ఒత్తిడి లేకుండా స్వతంత్రంగా విధులు నిర్వహించేలా ప్రభుత్వం చర్యలు తీసుకోవాలని విజ్ఞప్తి చేశారు.