గ్లోబల్ డేటా హబ్‌గా ఏపీ.. భారీ ప్రాజెక్టుకు ఎయిర్‌ట్రంక్ సన్నాహాలు

బ్లాక్‌స్టోన్ మద్దతు ఉన్న డేటా సెంటర్ సంస్థ ఎయిర్‌ట్రంక్ ఆంధ్రప్రదేశ్‌లో రెండు భారీ డేటా సెంటర్ క్యాంపస్‌లను ఏర్పాటు చేసేందుకు సిద్ధమవుతోంది. ఈ ప్రాజెక్టు కోసం సుమారు రూ.1.03 లక్షల కోట్లు, అంటే 11 బిలియన్ డాలర్లు పెట్టుబడి పెట్టాలని ప్రతిపాదించింది. ఈ రెండు డేటా సెంటర్లు కలిపి 1.8 గిగావాట్ల సామర్థ్యంతో అభివృద్ధి చేయనున్నారు. పర్యావరణంపై ప్రభావాన్ని తగ్గించే లక్ష్యంతో నీటి వినియోగం తక్కువగా ఉండే ఎయిర్ కూల్డ్ టెక్నాలజీని ఉపయోగించనున్నారు.

పెద్ద టెక్నాలజీ, డిజిటల్ మౌలిక సదుపాయాల ప్రాజెక్టులను ఆకర్షించేందుకు ఆంధ్రప్రదేశ్ ప్రయత్నిస్తున్న సమయంలో ఎయిర్‌ట్రంక్ ప్రతిపాదన ప్రాధాన్యం సంతరించుకుంది. ఇప్పటికే గూగుల్ రాష్ట్రంలో ఏఐ హబ్ ఏర్పాటుకు ప్రణాళికలు ప్రకటించింది. ఇప్పుడు ఎయిర్‌ట్రంక్ డేటా సెంటర్ క్యాంపస్‌లు కూడా అందుబాటులోకి వస్తే, అంతర్జాతీయ డేటా మౌలిక సదుపాయాల రంగంలో ఆంధ్రప్రదేశ్‌కు మరింత గుర్తింపు వచ్చే అవకాశం ఉంది. రాష్ట్రంలో డిజిటల్, టెక్నాలజీ రంగాల అభివృద్ధికి ఈ ప్రతిపాదనలు దోహదపడవచ్చు.