

తిరుమల శేషాచల కొండల్లో బ్రహ్మ, స్కంధ, వరాహ పురాణాల ప్రకారం 66 కోట్ల పుణ్యతీర్థాలు ఉన్నట్లు పురాణ ప్రతీతి. వీటిలో శ్రీవారి పుష్కరిణి, పాపవినాశనం, ఆకాశగంగ, పాండవ తీర్థం, శ్రీచక్ర తీర్థం, కుమార తీర్థం, శ్రీరామకృష్ణ తీర్థాలను అత్యంత పవిత్రమైన సప్త తీర్థాలుగా భావిస్తారు. ఈ తీర్థాల్లో పవిత్రమైన రోజుల్లో స్నానమాచరిస్తే పాపాలు తొలగి మోక్షం సిద్ధిస్తుందని భక్తుల విశ్వాసం. ప్రతి ఏటా ఈ తీర్థాలకు ప్రత్యేకంగా ముక్కోటి ఉత్సవాలు నిర్వహిస్తారు. ఇందులో భాగంగా కార్తిక శుద్ధ ద్వాదశి సందర్భంగా నవంబర్ 21న తిరుమలలో శ్రీచక్ర తీర్థ ముక్కోటి ఉత్సవం వైభవంగా జరగనుంది. టీటీడీ ఆగమ శాస్త్ర సంప్రదాయాల ప్రకారం ఈ వేడుకలను నిర్వహించనుంది.
శ్రీవారి ఆలయానికి సుమారు నాలుగు కిలోమీటర్ల దూరంలో శిలాతోరణం సమీపంలో శ్రీచక్ర తీర్థం ఉంది. పురాణాల ప్రకారం, పద్మనాభ మహర్షి ఇక్కడ 12 సంవత్సరాలు తపస్సు చేయగా, ఆయనను రాక్షసుడి బారి నుంచి రక్షించేందుకు శ్రీమహావిష్ణువు తన సుదర్శన చక్రాన్ని ప్రయోగించారు. అనంతరం ఆ చక్రాన్ని భక్తుల రక్షణ కోసం అక్కడే ఉండేలా వరమిచ్చినట్లు వరాహ పురాణం వివరిస్తోంది. అప్పటి నుంచి ఈ ప్రాంతం చక్రతీర్థంగా ప్రసిద్ధి చెందింది. ముక్కోటి పర్వదినం సందర్భంగా శ్రీవారి ఆలయ అర్చకులు, పరిచారకులు మంగళవాయిద్యాల నడుమ తీర్థానికి చేరుకుని చక్రత్తాళ్వారు, నరసింహస్వామి, ఆంజనేయస్వామి వారికి విశేష అభిషేకాలు, పుష్పాలంకరణలు, ప్రత్యేక పూజలు నిర్వహిస్తారు. ఈ పవిత్ర ఉత్సవాన్ని దర్శించుకోవడం, తీర్థ జలాలను శిరస్సుపై చల్లుకోవడం వల్ల పుణ్యఫలం లభిస్తుందని భక్తులు విశ్వసిస్తారు.














కామెంట్స్ (0)
ఇప్పటికి కామెంట్స్ లేవు
మొదటిగా కామెంట్ చేయండి!