సత్యం, అహింసతోనే ద్వేషపూరిత శక్తులకు సమాధానం: రాహుల్‌ గాంధీ

ద్వేషం, హింసతో ప్రత్యర్థులను ఎదుర్కోలేమని, ప్రేమ, సత్యం, అహింసతోనే తమ పోరాటాన్ని కొనసాగిస్తామని లోక్‌సభ ప్రతిపక్ష నేత, కాంగ్రెస్‌ అగ్రనేత రాహుల్‌ గాంధీ స్పష్టం చేశారు. హైదరాబాద్‌లో జరిగిన భారత్‌ సమ్మిట్‌లో ఆయన మాట్లాడుతూ.. ద్వేషం, హింస తమ సిద్ధాంతాలు కాదని పేర్కొన్నారు. కోపం, ద్వేషానికి తావులేకుండా ప్రేమతోనే ప్రత్యర్థులను ఎదుర్కొంటామని, చివరకు సత్యం, అహింస, ప్రేమ ముందు ద్వేషపూరిత శక్తులు ఓడిపోతాయని అన్నారు. తమతో కలిసి ఒకే ఆలోచనలతో, ఒకే లక్ష్యం కోసం పోరాడుతున్న మిత్రులందరికీ స్వాగతం పలికారు.

ఒకే తరహా ఆర్థిక వ్యవస్థ, ద్వేషపూరిత శక్తులకు వ్యతిరేకంగా అందరూ ఐక్యంగా పోరాడుతున్నారని రాహుల్‌ గాంధీ పేర్కొన్నారు. ప్రజాస్వామ్య విలువలు, ప్రజల హక్కుల పరిరక్షణ కోసం కలిసికట్టుగా ముందుకు సాగాలని పిలుపునిచ్చారు. దేశంలోని ప్రతి మూల నుంచి ఫాసిస్టు శక్తులను తరిమికొట్టడమే తమ లక్ష్యమని తెలిపారు. అయితే ఈ పోరాటంలో ఎవరినీ ద్వేషించడం, కించపరచడం లేదా అవమానించడం తమ ఉద్దేశం కాదని స్పష్టం చేశారు.