అగ్గిపెట్టె మచ్చకు కన్నీటి వీడ్కోలు.. అంత్యక్రియలకు భారీగా తరలివచ్చిన అభిమానులు

తనదైన మాటతీరు, వినూత్నమైన హావభావాలు, ప్రత్యేకమైన మ్యానరిజంతో సోషల్ మీడియాలో గుర్తింపు పొందిన ‘అగ్గిపెట్టె మచ్చ’ అలియాస్ కిరణ్ కుమార్ కన్నుమూయడంతో తిరుపతిలో విషాద ఛాయలు అలముకున్నాయి. అనారోగ్యంతో అక్టోబర్ 5న తిరుపతి స్విమ్స్ ఆస్పత్రిలో చేరిన ఆయనకు వైద్యులు వెంటిలేటర్‌పై చికిత్స అందించినప్పటికీ ఆరోగ్య పరిస్థితి విషమించడంతో మృతి చెందారు. కిరణ్ కుమార్ మరణవార్తతో కుటుంబ సభ్యులు, బంధువులు, స్నేహితులు, అభిమానులు తీవ్ర విషాదంలో మునిగిపోయారు.

తిరుపతి రూరల్‌లోని వైఎస్సార్ కాలనీలో జరిగిన కిరణ్ కుమార్ అంత్యక్రియలకు అభిమానులు భారీగా తరలివచ్చి కన్నీటి వీడ్కోలు పలికారు. సోషల్ మీడియాలో ఆయన చెప్పిన డైలాగులు, హావభావాలు మీమ్స్‌గా మారి ఎంతోమందిని అలరించాయి. యూట్యూబ్ ఇంటర్వ్యూలు, టీవీ కార్యక్రమాలతోనూ ఆయన మరింత ప్రజాదరణ పొందారు. ఆయనతో కలిసి వీడియోలు చేసిన యూట్యూబర్లు, కళాకారులు, స్నేహితులు సంతాపం వ్యక్తం చేశారు. నవ్వులు పంచిన అగ్గిపెట్టె మచ్చ ఇక లేరన్న విషయాన్ని అభిమానులు జీర్ణించుకోలేక కన్నీరుమున్నీరయ్యారు.