

కాంగ్రెస్ పార్టీ ఎన్నికల సమయంలో ఇచ్చిన హామీలన్నింటినీ అమలు చేస్తే తాను రాజకీయాల నుంచి తప్పుకుంటానని బీఆర్ఎస్ వర్కింగ్ ప్రెసిడెంట్ కేటీఆర్ ముఖ్యమంత్రి రేవంత్రెడ్డికి సవాల్ విసిరారు. హనుమకొండలోని కాకతీయ డిగ్రీ కళాశాల మైదానంలో ఆదివారం నిర్వహించిన బీఆర్ఎస్ జన చైతన్య సభలో ఆయన ప్రసంగించారు. అబద్ధపు హామీలతో కాంగ్రెస్ అధికారంలోకి వచ్చిందని విమర్శించారు. ఆ పార్టీ ఇచ్చిన 420 హామీల్లో ఒక్కటి కూడా పూర్తిస్థాయిలో అమలు కాలేదని ఆరోపించారు. మహిళలను కోటీశ్వరులను చేస్తామని చెప్పిన కాంగ్రెస్ ప్రభుత్వం కనీసం వారిని లక్షాధికారులుగానైనా చేయాలని డిమాండ్ చేశారు. గత బీఆర్ఎస్ ప్రభుత్వ హయాంలో వరంగల్కు నాలుగు ఐటీ కంపెనీలను తీసుకొచ్చి కనీసం వెయ్యి ఉద్యోగాలు కల్పించాలని లక్ష్యంగా పెట్టుకున్నామని గుర్తుచేశారు. కేసీఆర్ హయాంలో నిర్మించిన వరంగల్ సూపర్ స్పెషాలిటీ ఆస్పత్రిని ఇప్పటివరకు ప్రారంభించకపోవడంపై కూడా ప్రభుత్వాన్ని ప్రశ్నించారు.
కాంగ్రెస్ పాలనలో సంక్షేమం సున్నా, అభివృద్ధి గుండుసున్నా అన్నట్లుగా పరిస్థితి ఉందని కేటీఆర్ విమర్శించారు. ప్రజాపాలన పేరుతో అధికారంలోకి వచ్చిన ప్రభుత్వం ప్రస్తుతం పర్సంటేజీల పాలన సాగిస్తోందని ఆరోపించారు. అవినీతి, కమీషన్ల వ్యవహారాలను సొంత పార్టీ ఎమ్మెల్యేలు, నాయకులే బయటపెడుతున్నారని వ్యాఖ్యానించారు. ఎన్నికల హామీలపై ప్రశ్నిస్తే సమాధానం చెప్పకుండా సీఎం వ్యక్తిగత విమర్శలకు దిగుతున్నారని మండిపడ్డారు. ఫ్యూచర్ సిటీలో భవిష్యత్తు లేదని, వరంగల్లే భవిష్యత్తు నగరమని అన్నారు. తెలంగాణలో కాంగ్రెస్ ప్రభుత్వానికి కౌంట్డౌన్ ప్రారంభమైందని, మరో 500 రోజుల్లో బీఆర్ఎస్ తిరిగి అధికారంలోకి వస్తుందని ధీమా వ్యక్తం చేశారు. 2028లో కేసీఆర్ మరోసారి ముఖ్యమంత్రి అవుతారని జోస్యం చెప్పారు.




















కామెంట్స్ (0)
ఇప్పటికి కామెంట్స్ లేవు
మొదటిగా కామెంట్ చేయండి!