వీల్‌చైర్‌లో వెళ్తున్న వ్యక్తిపై దొంగల దాడి

పంజాబ్‌లోని జిరక్‌పూర్‌లో పట్టపగలు, జనసంచారం ఉన్న ప్రాంతంలో వీల్‌చైర్‌లో వెళ్తున్న వ్యక్తిని ఇద్దరు గుర్తుతెలియని వ్యక్తులు దోపిడీ చేసిన ఘటన కలకలం రేపింది. పాలం ఎన్‌క్లేవ్‌ ప్రాంతంలో తన ఇన్‌స్టిట్యూట్‌కు వెళ్తున్న సురేంద్ర పాల్‌ను బుధవారం ఉదయం సుమారు 10 గంటల సమయంలో బైకుపై వచ్చిన ఇద్దరు వ్యక్తులు టార్గెట్ చేశారు. ఆయన వద్ద ఉన్న పర్సును లాక్కొని అక్కడి నుంచి పరారైనట్లు పాల్‌ పోలీసులకు ఫిర్యాదు చేశారు. పర్సులో సుమారు రూ.5 వేల నగదు, మొబైల్‌ ఫోన్‌, క్రెడిట్‌ కార్డులు, పాన్‌ కార్డుతో పాటు ఇతర ముఖ్యమైన వస్తువులు ఉన్నట్లు తెలిపారు.

ఈ ఘటన సమీపంలోని సీసీటీవీ కెమెరాల్లో రికార్డయినట్లు తెలుస్తోంది. ఫుటేజ్‌ ఆధారంగా నిందితులను గుర్తించి పట్టుకునేందుకు పోలీసులు దర్యాప్తు చేస్తున్నారు. జనసంచారం ఉన్న సమయంలోనే ఈ ఘటన జరగడంతో స్థానికుల్లో ఆందోళన వ్యక్తమవుతోంది. జిరక్‌పూర్‌, పరిసర ప్రాంతాల్లో ఇలాంటి లాక్కునే ఘటనలు జరుగుతున్న నేపథ్యంలో పోలీసు గస్తీని పెంచాలని స్థానికులు కోరుతున్నారు. నిందితులను త్వరగా అరెస్ట్‌ చేసి, దొంగిలించిన వస్తువులను స్వాధీనం చేసుకోవాలని బాధితుడు పోలీసులను కోరారు.