

కలిసి చదువుకుంటూ, భవిష్యత్తుపై ఎన్నో ఆశలు పెట్టుకున్న ఇద్దరు యువతులు రోడ్డు ప్రమాదంలో ప్రాణాలు కోల్పోయారు. మరోవైపు ఈతకు వెళ్లిన ఇద్దరు బాలురు కాలువలో మునిగి మృత్యువాత పడ్డారు. కర్ణాటకలో మంగళవారం జరిగిన ఈ రెండు వేర్వేరు ఘటనలు నాలుగు కుటుంబాల్లో తీరని విషాదాన్ని నింపాయి. బెంగళూరు జిల్లా మాగడి తాలూకాలోని గుడేమారనహళ్లి సమీపంలో వేగంగా వెళ్తున్న కారు అదుపుతప్పి రోడ్డు పక్కన ఉన్న చెట్టును ఢీకొట్టింది. ఈ ప్రమాదంలో సప్తగిరి కళాశాలకు చెందిన గానవి (20), వైష్ణవి (20) అక్కడికక్కడే మృతి చెందారు. కారులో ఇద్దరు యువకులు, నలుగురు యువతులు కలిసి కుణిగల్కు వెళ్తుండగా ఈ ఘటన జరిగింది. ప్రమాదంలో మరో నలుగురు గాయపడగా, వారిలో ఇద్దరిని విక్టోరియా ఆసుపత్రికి, మరో ఇద్దరిని నెలమంగలలోని ప్రైవేట్ ఆసుపత్రికి తరలించారు. విక్టోరియా ఆసుపత్రిలో చికిత్స పొందుతున్న ఇద్దరి పరిస్థితి విషమంగా ఉన్నట్లు పోలీసులు తెలిపారు. డ్రైవర్ నిద్రమత్తులో వాహనం నడపడం వల్లే ప్రమాదం జరిగినట్లు ప్రాథమికంగా గుర్తించారు. పోలీసులు కేసు నమోదు చేసి దర్యాప్తు చేపట్టారు.
మరో విషాదకర ఘటనలో హొసపేటె తాలూకా బుక్కసాగర గ్రామ సమీపంలోని ఎల్లెల్సీ కాలువలో మునిగి ఇద్దరు బాలురు మృతి చెందారు. మృతులను కురుగోడు తాలూకా హెచ్. వీరాపుర గ్రామానికి చెందిన సతీశ్ (16), పక్కీరప్ప (12)గా గుర్తించారు. కుటుంబ సభ్యులతో కలిసి కొప్పళ జిల్లాలోని మునిరాబాద్ సమీపంలో ఉన్న హులిగెమ్మ ఆలయ దర్శనానికి వెళ్లిన వీరు తిరుగు ప్రయాణంలో బుక్కసాగరలోని బంధువుల ఇంట్లో బస చేశారు. మంగళవారం ఉదయం గ్రామ శివారులోని ఎల్లెల్సీ కాలువలో ఈతకు వెళ్లిన ఇద్దరూ నీటిలో మునిగిపోయారు. వారికి ఈత రాకపోవడంతో ప్రమాదం చోటుచేసుకుంది. సమాచారం అందుకున్న కుటుంబ సభ్యులు, స్థానికులు కాలువ వద్దకు చేరుకుని గాలింపు చేపట్టారు. గ్రామానికి చెందిన గజ ఈతగాళ్ల సహాయంతో ఇద్దరి మృతదేహాలను వెలికితీశారు. కమలాపుర పోలీసులు ఘటనా స్థలాన్ని పరిశీలించి కేసు నమోదు చేశారు. ఆలయ దర్శనానికి వెళ్లిన కుటుంబాల్లో ఈ ఘటనలు తీవ్ర విషాదాన్ని నింపాయి.


కామెంట్స్ (0)
ఇప్పటికి కామెంట్స్ లేవు
మొదటిగా కామెంట్ చేయండి!