దక్షిణ కొరియాకు ట్రంప్ షాక్..

అమెరికా అధ్యక్షుడు డొనాల్డ్ ట్రంప్ దక్షిణ కొరియాతో నిర్వహించే సంయుక్త సైనిక విన్యాసాలను గణనీయంగా తగ్గించాలని పెంటగాన్‌ను ఆదేశించారు. ఈ విన్యాసాలు అధిక వ్యయంతో కూడుకున్నవని, వాటిలో ఎక్కువ ఖర్చును అమెరికానే భరిస్తోందని ట్రంప్ పేర్కొన్నారు. ఇరాన్‌కు సంబంధించిన అమెరికా చర్యలకు దక్షిణ కొరియా మద్దతు ఇవ్వడానికి నిరాకరించడాన్ని కూడా ఆయన తన నిర్ణయానికి కారణంగా ప్రస్తావించారు. అంతేకాకుండా, ఉత్తర కొరియా అధ్యక్షుడు కిమ్ జోంగ్ ఉన్‌తో తనకు ఉన్న మంచి సంబంధాలను దృష్టిలో ఉంచుకుని ఈ నిర్ణయం తీసుకున్నట్లు తెలిపారు.

ప్రస్తుతం ‘ఉల్చి ఫ్రీడం షీల్డ్’ పేరుతో అమెరికా-దక్షిణ కొరియా వార్షిక సంయుక్త సైనిక విన్యాసాలు ప్రారంభమయ్యాయి. ఆగస్టు 17 నుంచి 27 వరకు జరిగే ఈ విన్యాసాల్లో సుమారు 18 వేల మంది దక్షిణ కొరియా సైనికులు పాల్గొంటున్నారు. ట్రంప్ ఆదేశాల నేపథ్యంలోనూ విన్యాసాలు షెడ్యూల్ ప్రకారమే కొనసాగుతాయని దక్షిణ కొరియా స్పష్టం చేసింది. తాజా పరిణామాలు అమెరికా-దక్షిణ కొరియా రక్షణ భాగస్వామ్యంపై, అలాగే కిమ్ జోంగ్ ఉన్‌తో ట్రంప్ మళ్లీ చర్చలు జరిపే అవకాశాలపై ఆసక్తిని పెంచుతున్నాయి.