ఇరాన్‌ యుద్ధం నుంచి ట్రంప్‌ బయటపడే యత్నం..

ఇరాన్‌తో కొనసాగుతున్న ఘర్షణకు ముగింపు పలికేందుకు అమెరికా అధ్యక్షుడు డొనాల్డ్‌ ట్రంప్‌ కొత్త మార్గాలను అన్వేషిస్తున్నట్లు తెలుస్తోంది. ఇరాన్‌తో అణు ఒప్పందం కుదుర్చుకోవాలన్న తన పాత డిమాండ్‌ను సైతం పక్కన పెట్టేందుకు ఆయన సిద్ధంగా ఉన్నట్లు అమెరికా మీడియా కథనాలు వెల్లడించాయి. హర్మూజ్‌ జలసంధిని ఇరాన్‌ పూర్తిగా తెరిచి వాణిజ్య నౌకల రాకపోకలకు అనుమతిస్తే.. అణు ఒప్పందం లేకుండానే ఘర్షణకు ముగింపు పలికేందుకు ట్రంప్‌ సుముఖంగా ఉన్నట్లు సమాచారం.

అయితే ఈ ప్రతిపాదనకు ఇరాన్‌ నుంచి ఎదురవుతున్న డిమాండ్లు ప్రధాన అడ్డంకిగా మారాయి. అమెరికా ఆంక్షలను ఎత్తివేయడంతో పాటు ప్రాంతం నుంచి తమ బలగాలను ఉపసంహరించుకోవాలని టెహ్రాన్‌ కోరుతున్నట్లు నివేదికలు పేర్కొంటున్నాయి. హర్మూజ్‌ జలసంధి పునఃప్రారంభంపై కూడా ఇరాన్‌ తన షరతులను స్పష్టం చేస్తోంది. మరోవైపు, అమెరికాలో మధ్యంతర ఎన్నికలు సమీపిస్తుండటం, సుదీర్ఘ ఘర్షణతో ఏర్పడుతున్న రాజకీయ, ఆర్థిక ఒత్తిళ్లు కూడా ట్రంప్‌ యుద్ధం నుంచి బయటపడే మార్గాలను అన్వేషించడానికి కారణాలుగా కనిపిస్తున్నాయి.