ఇరాన్ రహస్య భూగర్భ మార్గాలపై అమెరికా నిఘా..

అమెరికా, ఇరాన్ మధ్య ఉద్రిక్తతలు కొనసాగుతున్న నేపథ్యంలో టెహ్రాన్‌కు ఆయుధాలు, ఇతర సైనిక సామగ్రి చేరకుండా అడ్డుకునేందుకు అగ్రరాజ్యం చర్యలను ముమ్మరం చేస్తోంది. ఇరాన్ ఓడరేవులు, అంతర్జాతీయ జలమార్గాలపై అమెరికా విధించిన ఆంక్షల నేపథ్యంలో ప్రత్యామ్నాయ సరఫరా మార్గాలపై నిఘా పెంచింది. ఈ క్రమంలో ఇరాన్ భూ సరిహద్దులు, కాస్పియన్ సముద్రం మీదుగా అధునాతన ఆయుధాలు, సైనిక పరికరాలు, నిషేధిత సామగ్రిని తరలించకుండా అడ్డుకునేందుకు 20 మంది సభ్యులతో ప్రత్యేక విభాగాన్ని ఏర్పాటు చేస్తున్నట్లు అమెరికా సెంట్రల్ కమాండ్ (CENTCOM) ప్రకటించింది. ఈ విభాగానికి టాస్క్‌ఫోర్స్ ఐరన్ గేట్ అని పేరు పెట్టింది.

ఫ్లోరిడాలోని టాంపా కేంద్రంగా ఈ టాస్క్‌ఫోర్స్ పనిచేయనుంది. ఇందులో సైనికులతో పాటు పౌరులకు కూడా అవకాశం కల్పించనున్నారు. ఇతర అమెరికా ప్రభుత్వ విభాగాలతో సమన్వయం చేసుకుంటూ ఆయుధ వ్యవస్థలు, ద్వంద్వ వినియోగ సాంకేతిక పరిజ్ఞానం, ఆంక్షలకు లోబడి ఉన్న సామగ్రి, అక్రమ ఆర్థిక వనరుల తరలింపును అడ్డుకోవడం ఈ విభాగం ప్రధాన లక్ష్యం. ఉగ్రవాద సంస్థలకు నిధులు సమకూర్చడం, ఆయుధ తయారీ కేంద్రాలను పునర్నిర్మించడం, సైనిక సామర్థ్యాలను తిరిగి పెంపొందించుకోవడం వంటి ఇరాన్ ప్రయత్నాలను నియంత్రించడమే లక్ష్యంగా అమెరికా ఈ చర్యలు చేపడుతోంది.