అమెరికాలో దేశవ్యాప్తంగా విమానాల టేకాఫ్‌లు నిలిపివేత

అమెరికాలోని ఎయిర్ ట్రాఫిక్ కంట్రోల్ కేంద్రాల్లో కమ్యూనికేషన్ వ్యవస్థలో సాంకేతిక వైఫల్యం తలెత్తడంతో ఫెడరల్ ఏవియేషన్ అడ్మినిస్ట్రేషన్ (FAA) దేశవ్యాప్తంగా గ్రౌండ్‌స్టాప్‌ విధించింది. విమాన భద్రతను దృష్టిలో ఉంచుకుని కొత్త విమానాల టేకాఫ్‌లను తాత్కాలికంగా నిలిపివేసింది. అయితే, అప్పటికే గాల్లో ఉన్న 4,042 విమానాలకు ప్రయాణాన్ని కొనసాగించి సురక్షితంగా ల్యాండ్ అయ్యేందుకు అనుమతి ఇచ్చింది.

ఈ సాంకేతిక సమస్య కారణంగా అమెరికా వ్యాప్తంగా 11 వేలకుపైగా విమానాల రాకపోకలకు అంతరాయం ఏర్పడింది. వెయ్యికి పైగా విమానాలు రద్దు కాగా, సుమారు 10 వేల విమానాలు ఆలస్యంగా నడిచాయి. దీంతో ప్రయాణికులు తీవ్ర ఇబ్బందులు ఎదుర్కొన్నారు. 2001 తర్వాత అమెరికాలో దేశవ్యాప్తంగా గ్రౌండ్‌స్టాప్‌ విధించడం ఇది రెండోసారి అని నివేదికలు పేర్కొన్నాయి. కమ్యూనికేషన్ వ్యవస్థలో తలెత్తిన లోపానికి గల కారణాలను గుర్తించేందుకు FAA సాంకేతిక బృందాలు దర్యాప్తు ప్రారంభించాయి. ప్రాథమికంగా సైబర్‌ దాడి జరిగినట్లు ఎలాంటి ఆధారాలు లేవని అమెరికా హోంల్యాండ్ సెక్యూరిటీ అధికారులు వెల్లడించారు.