అమెరికా ప్రీస్కూల్ ఫీజు చూసి షాకైన భారతీయ మహిళ

అమెరికాలోని కనెక్టికట్‌లో నివసిస్తున్న భారతీయ కంటెంట్ క్రియేటర్ సోనల్ చౌదరి.. తన రెండేళ్ల కుమార్తె బానీ కోసం ఓ ప్రైవేట్ ప్రీస్కూల్‌ను సందర్శించారు. అక్కడ కేవలం ఎనిమిది మంది పిల్లలకు ఇద్దరు టీచర్లు ఉండటంతో పాటు పాటలు, యోగా, క్రియేటివ్ యాక్టివిటీస్, ఆటలు, వయసుకు తగ్గట్టుగా నేర్చుకునే కార్యక్రమాలను నిర్వహిస్తున్నట్లు సిబ్బంది వివరించారు.

అయితే ప్రీస్కూల్ ఫీజు సోనల్‌ను ఆశ్చర్యానికి గురిచేసింది. వారానికి రెండు రోజులు పంపితే ఏడాదికి సుమారు రూ.4 లక్షలు, ఐదు రోజులు పంపితే దాదాపు రూ.9 లక్షలు చెల్లించాలి. సెప్టెంబర్ నుంచి జూన్ చివరి వరకు ఉదయం 8:45 నుంచి 11:45 వరకు తరగతులు జరుగుతాయి. చిన్న తరగతులు, వ్యక్తిగత శ్రద్ధ, ప్రత్యేక కార్యక్రమాల కారణంగా ఫీజు ఎక్కువగా ఉందని సోనల్ పేర్కొన్నారు. ఈ వీడియో వైరల్ కావడంతో అమెరికాలో ప్రైవేట్ ప్రీస్కూల్ విద్య ఖర్చుపై సోషల్ మీడియాలో చర్చ మొదలైంది.