హీరో రామ్ తో పెళ్లి, డేటింగ్ పై స్పందించిన హీరోయిన్ భాగ్యశ్రీ

ర‌వితేజ స‌ర‌స‌న‌ ‘మిస్టర్ బచ్చన్’ సినిమాతో టాలీవుడ్‌కు పరిచయమైన నటి భాగ్యశ్రీ బోర్సే, యంగ్ హీరో రామ్ పోతినేని మధ్య ప్రేమాయణం సాగుతోందంటూ వస్తున్న రూమర్లకు ఆమె తాజా వ్యాఖ్యలు మరింత బలాన్నిచ్చాయి. ఇటీవల ఒక ఇంటర్వ్యూలో ఆమె పరోక్షంగా చేసిన వ్యాఖ్యలు ఇప్పుడు సోషల్ మీడియాలో హాట్ టాపిక్‌గా మారాయి. దీంతో వీరిద్దరి రిలేషన్‌షిప్‌పై మళ్లీ జోరుగా చర్చ మొదలైంది.

కొంతకాలంగా రామ్, భాగ్యశ్రీ డేటింగ్‌లో ఉన్నారనే ప్రచారం సినీ వర్గాల్లో వినిపిస్తోంది. వీరిద్దరూ కలిసి నటించిన‌ ‘ఆంధ్రా కింగ్ తాలూకా’ సినిమా సెట్స్‌లో ఈ ప్రచారానికి బీజం పడింది. గతంలో ఈ వార్తలపై రామ్ పోతినేని స్పందించి, వాటిని ఖండించారు. అయితే, భాగ్యశ్రీ మాత్రం ఇప్పటివరకు నేరుగా స్పందించలేదు. ఇటీవల ‘లెనిన్’ సినిమా ప్రమోషన్లలో "హైదరాబాద్ నాకు రెండో ఇల్లు" అని ఆమె చెప్పడంతో ఈ ఊహాగానాలు మళ్లీ ఊపందుకున్నాయి.

తాజాగా ఓ ఇంటర్వ్యూలో భాగంగా, "మీరు కలిసి పనిచేసిన హీరోల్లో ఎవరితో ఫ్రెండ్‌షిప్ చేస్తారు? ఎవరితో డేటింగ్ చేస్తారు? ఎవరిని పెళ్లి చేసుకుంటారు?" అనే ఆసక్తికరమైన ప్రశ్న భాగ్యశ్రీకి ఎదురైంది. దీనికి ఆమె బదులిస్తూ.. అఖిల్ అక్కినేని తనకు మంచి స్నేహితుడని తెలిపారు. అయితే, డేటింగ్, పెళ్లి విషయానికి వచ్చేసరికి, తాను కలిసి నటించిన వారిలో పెళ్లికాని హీరో ఒక్కరే ఉన్నారంటూ నవ్వేశారు. ఆమె పరోక్షంగా రామ్‌ను ఉద్దేశించే ఈ వ్యాఖ్యలు చేశారని నెటిజన్లు భావిస్తున్నారు.ఈ వ్యాఖ్యలకు సంబంధించిన వీడియో ప్రస్తుతం సోషల్ మీడియాలో వైరల్ అవుతోంది. అభిమానులు సరదాగా 'భాగ్యశ్రీ పోతినేని' అంటూ పోస్టులు పెడుతున్నారు. అయితే, ఇది కేవలం సరదాగా చేసిన వ్యాఖ్యలేనని మరికొందరు అభిప్రాయపడుతున్నారు.