ప్రభాస్ ‘ఫౌజీ’లో నేతాజీ పాత్రపై విమర్శలు

ప్రభాస్‌ నటిస్తున్న భారీ చిత్రం ఫౌజీ నుంచి ఇటీవల విడుదలైన ప్రత్యేక గ్లింప్స్‌కు అభిమానులు, ప్రేక్షకుల నుంచి మంచి స్పందన లభించింది. అయితే, అందులోని ఓ సన్నివేశం ఇప్పుడు వివాదానికి దారి తీసింది. నేతాజీ సుభాష్ చంద్రబోస్‌, ప్రభాస్‌ పాత్రను అడాల్ఫ్ హిట్లర్‌కు పరిచయం చేస్తున్నట్లుగా చూపించిన సన్నివేశంపై నేతాజీ మనవడు చంద్రకుమార్ బోస్ అభ్యంతరం వ్యక్తం చేసినట్లు సమాచారం. ఈ సన్నివేశం ద్వారా నేతాజీని కల్పిత పాత్రకు సహాయకుడిగా చూపించిన భావన కలుగుతోందని ఆయన అభిప్రాయపడినట్లు తెలుస్తోంది. అంతేకాకుండా, భారత స్వాతంత్ర్య పోరాటానికి మద్దతు కోరే రాజకీయ నాయకుడిగా హిట్లర్‌ను కలిసిన నేతాజీ భేటీని సాధారణ పరిచయంలా చూపించడం సరైంది కాదని ఆయన పేర్కొన్నట్లు వార్తలు వస్తున్నాయి.

నేతాజీకి తగిన గౌరవం ఇస్తూ, ఆ చారిత్రక భేటీకి సంబంధించిన సందర్భాన్ని సరిగ్గా చూపించాలని, ఈ విషయంలో చిత్రబృందం క్షమాపణ చెప్పాలని ఆయన కుటుంబం కోరినట్లు సమాచారం. సమాజ్‌వాదీ పార్టీ ఎంపీ అవధేశ్ ప్రసాద్ కూడా ఈ సన్నివేశంపై విమర్శలు చేసినట్లు తెలుస్తోంది. ఈ వివాదంపై చిత్రబృందం స్పందన ఇంకా వెలువడాల్సి ఉంది. మైత్రీ మూవీ మేకర్స్ నిర్మిస్తున్న ఫౌజీ ఒక భారీ యుద్ధ నేపథ్య యాక్షన్ డ్రామా. ఇందులో ఇమాన్వి, అనుపమ్ ఖేర్, మిథున్ చక్రవర్తి, జయప్రద తదితరులు కీలక పాత్రల్లో నటిస్తున్నారు. విశాల్ చంద్రశేఖర్ సంగీతం అందిస్తున్న ఈ చిత్రం 2027 మార్చి 19న థియేటర్లలో విడుదల కానుంది.