భారత్‌ ఒత్తిడిలోకి నెట్టింది.. మూడో టీ20లో గెలుస్తాం: బ్రాస్‌వెల్‌

భారత్‌తో జరుగుతున్న ఐదు టీ20ల సిరీస్‌లో న్యూజిలాండ్‌ వరుసగా రెండు మ్యాచ్‌ల్లో ఓటమి చవిచూసింది. సిరీస్‌లో నిలవాలంటే మంగళవారం వెల్లింగ్టన్‌లో జరగనున్న మూడో టీ20లో కివీస్‌ తప్పనిసరిగా విజయం సాధించాలి. కీలక పేసర్లు మాట్‌ హెన్రీ, లాకీ ఫెర్గూసన్‌ గాయాల కారణంగా దూరం కావడం న్యూజిలాండ్‌కు ఎదురుదెబ్బగా మారింది. ఈ నేపథ్యంలో ఆ జట్టు స్పిన్‌ ఆల్‌రౌండర్‌ మైకెల్‌ బ్రాస్‌వెల్‌ మాట్లాడుతూ, గత రెండు మ్యాచ్‌ల్లో టీమ్‌ఇండియా తమపై ఒత్తిడి పెంచిందని అంగీకరించాడు. ఓటముల నుంచి పాఠాలు నేర్చుకుని, తదుపరి మ్యాచ్‌లో మెరుగైన ప్రదర్శనతో తిరిగి పుంజుకుంటామని ధీమా వ్యక్తం చేశాడు.

అంతర్జాతీయ క్రికెట్‌లో భారత్‌ అత్యుత్తమ జట్లలో ఒకటని, అలాంటి జట్టును ఓడించాలంటే అన్ని విభాగాల్లోనూ అత్యుత్తమ ఆటతీరు కనబరచాలని బ్రాస్‌వెల్‌ పేర్కొన్నాడు. ముఖ్యంగా డెత్‌ ఓవర్లలో భారత బ్యాటర్లు అద్భుతంగా ఆడుతూ తమపై ఒత్తిడి పెంచారని తెలిపాడు. తన స్పెల్‌లో చివరి బంతిని భారత బ్యాటర్‌ భారీ సిక్సర్‌గా మలిచిన సందర్భాన్ని ప్రస్తావిస్తూ, టీ20 క్రికెట్‌లో ఇలాంటి చిన్న సంఘటనలే మ్యాచ్‌ ఫలితంపై పెద్ద ప్రభావం చూపుతాయని వివరించాడు. బ్యాటింగ్‌, బౌలింగ్‌లో మరింత మెరుగుపడి వెల్లింగ్టన్‌లో విజయం సాధించి సిరీస్‌లో మళ్లీ పోటీలోకి వస్తామని బ్రాస్‌వెల్‌ ఆశాభావం వ్యక్తం చేశాడు.