సీతమ్మ పాత్రలో నటించడం ప్రత్యేక అనుభవం.. సాయిపల్లవి భావోద్వేగ వ్యాఖ్యలు

నితేశ్‌ తివారీ దర్శకత్వంలో తెరకెక్కుతున్న ‘రామాయణ’ చిత్రంలో సీతమ్మ పాత్రలో నటించడం తనకు ఎంతో ప్రత్యేకమైన అనుభవమని నటి సాయిపల్లవి తెలిపారు. సినిమా ప్రచారంలో భాగంగా ఆమె, కథానాయకుడు రణ్‌బీర్‌ కపూర్‌ ‘కౌన్‌ బనేగా కరోడ్‌పతి 18’ కార్యక్రమానికి అతిథులుగా హాజరయ్యారు. ఈ సినిమాలో అవకాశం రావడం ఎలా అనిపించిందని అడిగినప్పుడు సాయిపల్లవి తన అనుభవాన్ని పంచుకున్నారు. సాధారణంగా ఏ పాత్రలో నటించినా దానికి తాను ఏమి చేయగలననే కోణంలో ఆలోచిస్తానని, అయితే సీతమ్మ పాత్ర విషయంలో మాత్రం తన వ్యక్తిగత ఆలోచనలకంటే ఆ పాత్ర ద్వారా నేర్చుకునే విషయాలకే ప్రాధాన్యమిచ్చానని చెప్పారు. సెట్స్‌లోకి వెళ్లే ముందు సీతమ్మను ప్రార్థించి, ఈ పాత్రను తనతో చేయించాలని వేడుకున్నట్లు తెలిపారు. ఆమె మాటలను విన్న అమితాబ్‌ బచ్చన్‌ ప్రశంసించారు.

‘రామాయణ’లో రణ్‌బీర్‌ కపూర్‌ రాముడిగా, సాయిపల్లవి సీతగా, యశ్‌ రావణుడిగా, రవి దూబే లక్ష్మణుడిగా కనిపించనున్నారు. హనుమంతుడి పాత్రలో సన్నీ దేవోల్‌ నటిస్తున్నారు. ఈ ఇతిహాస గాథను రెండు భాగాలుగా ప్రేక్షకుల ముందుకు తీసుకురావాలని చిత్ర బృందం నిర్ణయించింది. తొలి భాగం 2026 నవంబరు 5న విడుదల కానున్నట్లు ప్రకటించారు. భారతీయ ఇతిహాసాన్ని భారీ స్థాయిలో తెరకెక్కిస్తున్న ఈ చిత్రంపై ప్రేక్షకుల్లో ఆసక్తి నెలకొంది.