‘రాకా’ ఆలస్యానికి అసలు కారణం ఇదేనా?

అల్లు అర్జున్‌ కథానాయకుడిగా అట్లీ దర్శకత్వంలో రూపొందుతున్న ‘రాకా’పై దేశవ్యాప్తంగా భారీ అంచనాలు ఉన్నాయి. ఈ సినిమాకు సంబంధించిన గ్లిమ్స్‌ కోసం అభిమానులు ఎంతోకాలంగా ఎదురుచూస్తున్నారు. అట్లీ పుట్టినరోజు సందర్భంగా గ్లిమ్స్‌ విడుదల చేస్తారని ప్రచారం జరిగినా, అది సిద్ధం కాకపోవడంతో ఆ కార్యక్రమం వాయిదా పడింది. అల్లు అర్జున్‌ ఇప్పటికే గ్లిమ్స్‌కు అవసరమైన చిత్రీకరణ, డబ్బింగ్‌ పూర్తి చేశాడనే సమాచారం ఉన్నప్పటికీ విడుదల మాత్రం జరగలేదు. దీంతో అభిమానుల్లో అసహనం పెరిగింది. అయితే చిత్రబృందం మాత్రం గ్లిమ్స్‌ను మరింత భారీగా తీర్చిదిద్దేందుకు సమయం తీసుకుంటున్నట్టు తెలుస్తోంది.

గత 2 వారాలుగా ప్రత్యేక బృందం గ్లిమ్స్‌పై పని చేస్తున్నట్టు సమాచారం. ఇప్పటికే సిద్ధమైన చిత్రీకరణ నుంచి కీలక దృశ్యాలను తీసుకుని 2, 3 రూపాల్లో గ్లిమ్స్‌ రూపొందించారట. అయితే అవి అల్లు అర్జున్‌, అట్లీకి పూర్తిగా నచ్చకపోవడంతో మళ్లీ మార్పులు చేస్తున్నట్టు తెలుస్తోంది. ప్రతి దృశ్యం సినిమాపై అంచనాలను పెంచేలా ఉండాలని ఇద్దరూ భావిస్తున్నట్టు సమాచారం. దసరా కానుకగా గ్లిమ్స్‌ విడుదల చేసే అవకాశం ఉందనే ప్రచారం జరుగుతోంది. సన్‌ పిక్చర్స్‌ పతాకంపై కళానిధి మారన్‌ నిర్మిస్తున్న ఈ చిత్రంలో దీపికా పదుకొణెతో పాటు పలువురు కథానాయికలు నటిస్తున్నట్టు వార్తలు ఉన్నాయి. సాయి అభ్యంకర్‌ సంగీతం అందిస్తున్న ఈ విజ్ఞాన కల్పిత యాక్షన్‌ చిత్రంపై దేశవ్యాప్తంగా ఆసక్తి కొనసాగుతోంది.