స్టార్స్‌ను వదిలి కొత్త హీరోలతో కార్తీక్ సుబ్బరాజ్ పరీక్ష?

కోలీవుడ్‌లో స్టార్ హీరోలతో సినిమాలు చేసిన దర్శకుడు కార్తీక్ సుబ్బరాజ్‌ ఇప్పుడు కొత్త తరహా ప్రయోగానికి సిద్ధమయ్యారు. ఇటీవల సూర్యతో తెరకెక్కించిన ‘రెట్రో’ ఆశించిన స్థాయిలో మెప్పించకపోవడంతో ఈసారి కొత్త తరం నటులతో ‘డోరతీ’ చిత్రాన్ని రూపొందించారు. ఇందులో కీర్తి సురేష్‌ కథానాయికగా నటించగా, సనంద్‌, రిషికాంత్‌ కీలక పాత్రల్లో కనిపించనున్నారు. ఇళయరాజా సంగీతం అందించిన ఈ సినిమా ఇటీవల టొరంటో ఫిల్మ్ ఫెస్టివల్‌లో ప్రదర్శితమైంది. ఈ నెల 25న ప్రేక్షకుల ముందుకు రానుంది.

‘డోరతీ’ కథ సుబ్బు, కార్తీ జీవితాల్లో డోరతీ కారణంగా చోటుచేసుకునే పరిణామాల చుట్టూ సాగనున్నట్లు తెలుస్తోంది. అట్లీ, లోకేశ్ కనగరాజ్ వంటి దర్శకులు స్టార్ హీరోలతో సినిమాలు చేస్తుండగా, కార్తీక్ సుబ్బరాజ్‌ మాత్రం ప్రస్తుతం ఎదుగుతున్న నటులతో ముందుకు సాగుతున్నారు. ‘డోరతీ’ తర్వాత మలయాళంలో ఓ సినిమా చేయాలని ఆయన భావిస్తున్నట్లు సమాచారం. నిజ జీవిత కథ ఆధారంగా ఆ చిత్రాన్ని రూపొందించనున్నట్లు ఇటీవల వెల్లడించారు. ప్రస్తుతం ‘డోరతీ’ ఫలితంపైనే సినీ వర్గాల దృష్టి నెలకొంది.