కుంభకర్ణుడి పునర్జన్మ.. వారణాసి కథపై కొత్త ట్విస్ట్!

టాలీవుడ్‌లో అత్యంత ఆసక్తి రేకెత్తిస్తున్న చిత్రాల్లో దర్శకధీరుడు ఎస్‌ఎస్‌ రాజమౌళి తెరకెక్కిస్తున్న ‘వారణాసి’ ఒకటి. ‘బాహుబలి’, ‘ఆర్ఆర్ఆర్’ చిత్రాలతో ప్రపంచవ్యాప్తంగా గుర్తింపు తెచ్చుకున్న రాజమౌళి.. ఈసారి మహేశ్ బాబుతో కలిసి భారీ ప్రాజెక్ట్‌ను రూపొందిస్తున్నారు. డివోషనల్ అంశాలతో కూడిన ఈ సినిమా ప్రపంచాన్ని దాదాపు మూడు నిమిషాల గ్లింప్స్‌తో ప్రేక్షకులకు పరిచయం చేశారు. అయితే సినిమా కథకు సంబంధించిన పూర్తి వివరాలను మాత్రం దర్శకుడు గోప్యంగా ఉంచుతున్నారు. మరోవైపు, ‘వారణాసి’ కథ ఇదేనంటూ సోషల్ మీడియాలో ఓ థియరీ వైరల్ అవుతోంది. రాజమౌళి గతంలో వెల్లడించిన వివరాల ప్రకారం.. ఈ సినిమాలో ప్రస్తుత కాలంతో పాటు శ్రీరాముడు జీవించిన త్రేతాయుగానికి సంబంధించిన సన్నివేశాలు కూడా ఉండనున్నాయి. ఇందులో మహేశ్ బాబు శ్రీరాముడి పాత్రలోనూ కనిపించనున్నట్లు సమాచారం.

సోషల్ మీడియాలో ప్రచారంలో ఉన్న థియరీ ప్రకారం.. కుంభకర్ణుడు పునర్జన్మలో కుంభగా మారతాడట. ఈ పాత్రను పృథ్వీరాజ్ సుకుమారన్ పోషిస్తున్నట్లు ప్రచారం జరుగుతోంది. కదల్లేని స్థితిలో ఉన్న కుంభ.. తన సోదరుడు రావణుడికి చెందిన తొమ్మిది వజ్రాలను సొంతం చేసుకోవాలని లక్ష్యంగా పెట్టుకుంటాడట. రామ-రావణ యుద్ధ సమయంలో ఆ వజ్రాలు వేర్వేరు దేశాల్లో చెల్లాచెదురుగా పడిపోతాయని ఈ కథనం చెబుతోంది. వాటిని సేకరించేందుకు రుద్ర (మహేశ్ బాబు)ను కుంభ పంపిస్తాడట. ఈ క్రమంలో రుద్ర త్రేతాయుగంలోకి ప్రయాణించి కుంభ అసలు ఉద్దేశాన్ని తెలుసుకుంటాడు. దీంతో వజ్రాలు కుంభకు దక్కకుండా గతంలోనే యుద్ధ పరిణామాలను మార్చేందుకు ప్రయత్నిస్తాడట. అలా ప్రస్తుత కాలంలో కుంభకు వజ్రాలపై ఆశ లేకుండా చేస్తాడనేది ఈ థియరీ సారాంశం. అయితే ఈ కథకు సంబంధించి చిత్రబృందం నుంచి అధికారిక ప్రకటన రాలేదు. కాబట్టి దీనిని ధ్రువీకరించని సోషల్ మీడియా ప్రచారంగానే చూడాలి.