వైద్యులు సూచించిన ఆరోగ్యకరమైన ఆహారంలో వంకాయకు ప్రత్యేక స్థానం!

గుత్తి వంకాయ ఫ్రై ఆంధ్రుల సంప్రదాయ వంటకాల్లో ప్రత్యేకమైనది. మసాలా దినుసుల ఘుమఘుమలతో, అద్భుతమైన రుచితో ఉండే ఈ వంటకాన్ని ఇంట్లోనే సులభంగా తయారు చేసుకోవచ్చు. ఇందుకోసం పావు కిలో చిన్న వంకాయలను తీసుకుని, కాడలు ఉండేలా నాలుగు వైపులా గాట్లు పెట్టాలి. అవి నల్లబడకుండా ఉండేందుకు ఉప్పునీటిలో వేయాలి. అనంతరం పాన్‌లో రెండు టేబుల్ స్పూన్ల నూనె వేసి, కొద్దిగా ఉప్పు, పసుపు కలిపి వంకాయలను మీడియం మంటపై మెత్తగా అయ్యే వరకు వేయించాలి. మరోవైపు వేరుశెనగ గుళ్లు, శెనగపప్పు, మినప్పప్పు, జీలకర్ర, ఆవాలు, నువ్వులు, మెంతులు, ఎండుమిరపకాయలు, వెల్లుల్లి రెబ్బలను దోరగా వేయించి పక్కన పెట్టుకోవాలి. ఈ దినుసులు చల్లారిన తర్వాత మసాలా తయారీకి సిద్ధం చేసుకోవాలి.

వేయించిన మసాలా దినుసులను మిక్సీలో వేసి, తగినంత ఉప్పు, పసుపు, చింతపండు, రుచికి తగ్గట్టుగా గరం మసాలా కలిపి నీళ్లు పోయకుండా బరకగా గ్రైండ్ చేయాలి. ఈ మసాలాను ముందుగా వేయించి పెట్టుకున్న వంకాయల గాట్లలో నింపాలి. అనంతరం అదే పాన్‌లో కొద్దిగా నూనె వేసి పచ్చిమిరపకాయలు, కరివేపాకు వేయించాలి. ఇప్పుడు మసాలా నింపిన వంకాయలను వేసి, మిగిలిన మసాలా పొడిని కూడా కలపాలి. తక్కువ మంటపై కొన్ని నిమిషాలు నెమ్మదిగా వేయించాలి. మసాలా మాడిపోకుండా మధ్యమధ్యలో జాగ్రత్తగా కలుపుతూ చివరగా కొత్తిమీర చల్లి స్టవ్ ఆఫ్ చేయాలి. అంతే.. ఘుమఘుమలాడే గుత్తి వంకాయ ఫ్రై సిద్ధం. వేడి వేడి అన్నంలో కలుపుకుని తింటే ఈ వంటకం అద్భుతమైన రుచిని అందిస్తుంది.