ముంబైలో శ్రీలీల సందడి.. షూటింగ్ మళ్లీ మొదలు!

టాలీవుడ్‌లో వరుస అవకాశాలతో బిజీగా ఉన్న శ్రీలీల ఇప్పుడు బాలీవుడ్‌లోనూ తన సత్తా చాటేందుకు సిద్ధమవుతున్నారు. కార్తీక్ ఆర్యన్ హీరోగా, ప్రముఖ దర్శకుడు అనురాగ్ బసు తెరకెక్కిస్తున్న భారీ రొమాంటిక్ మ్యూజికల్ చిత్రంలో ఆమె కథానాయికగా నటిస్తున్నారు. చాలా కాలంగా వాయిదాలు పడుతూ వచ్చిన ఈ సినిమా షూటింగ్ తాజాగా ముంబైలో మళ్లీ ప్రారంభమైనట్లు సమాచారం. ప్రస్తుతం శ్రీలీల ఈ షెడ్యూల్‌లో పాల్గొంటూ తనకు సంబంధించిన కీలక సన్నివేశాలను పూర్తి చేస్తున్నట్లు తెలుస్తోంది. ఈ మోస్ట్ అవేటెడ్ చిత్రానికి ‘తు గై లవ్ కామ్’ అనే పేరు పెట్టినట్లు ప్రచారం జరుగుతోంది. ప్రపంచవ్యాప్తంగా 2027 జనవరి 26న విడుదలకు సన్నాహాలు చేస్తున్నట్లు సమాచారం. అయితే దీనిపై అధికారిక ప్రకటన రావాల్సి ఉంది. టీ-సిరీస్ బ్యానర్‌పై భూషణ్ కుమార్ నిర్మిస్తున్న ఈ సినిమాలో సైఫ్ అలీ ఖాన్, వరుణ్ ధావన్ కీలక పాత్రల్లో నటిస్తున్నారు.

మొదట ‘ఆషికీ 3’గా భావించిన ఈ ప్రాజెక్ట్‌ను కొన్ని కాపీరైట్ కారణాలతో కొత్త కథగా మార్చినట్లు తెలుస్తోంది. ప్రీతమ్ సంగీతం అందిస్తున్న ఈ చిత్రాన్ని అనురాగ్ బసు తనదైన శైలిలో రూపొందిస్తున్నారు. సంగీతానికి ప్రాధాన్యత ఉండే ఈ సినిమా ద్వారా శ్రీలీల బాలీవుడ్‌లో తన అదృష్టాన్ని పరీక్షించుకోనున్నారు. మరోవైపు కార్తీక్ ఆర్యన్ ఇప్పటికే తన భాగానికి సంబంధించిన పెద్ద మొత్తంలో షూటింగ్ పూర్తి చేసినట్లు సమాచారం. షెడ్యూల్ సమస్యల కారణంగా పలుమార్లు వాయిదా పడిన సినిమా ఇప్పుడు చివరి దశకు చేరుకుంటున్నట్లు తెలుస్తోంది. శ్రీలీల ఇటీవల ‘ఉస్తాద్ భగత్ సింగ్’లో కనిపించగా, ప్రస్తుతం ‘ఓం చాప్టర్ 1: ఉధిరం - ది బ్లడ్ వుడ్’లోనూ నటిస్తున్నారు. అనురాగ్ బసు దర్శకత్వం, కార్తీక్ ఆర్యన్-శ్రీలీల జోడీ, ప్రీతమ్ సంగీతం కారణంగా ఈ చిత్రంపై అంచనాలు పెరుగుతున్నాయి.