మటన్ వంటలో ఈ జాగ్రత్తలు తప్పనిసరి: వైద్యులు

మటన్‌ను వండేటప్పుడు ముక్కల పరిమాణం ఒకేలా ఉండేలా మధ్యస్థంగా కట్ చేసుకోవాలి. పెద్ద ముక్కలు ఉడకడానికి ఎక్కువ సమయం పడే అవకాశం ఉంటుంది. మటన్‌ను శుభ్రంగా కడిగిన తర్వాత కొద్దిగా నిమ్మరసం లేదా వెనిగర్ పట్టించి కొంతసేపు పక్కన పెడితే వాసన తగ్గడంతో పాటు మాంసం మెత్తబడటానికి సహాయపడుతుంది. అయితే నిమ్మరసం లేదా వెనిగర్‌ను ఎక్కువగా ఉపయోగించకుండా పరిమితంగా తీసుకోవడం మంచిది.

మటన్‌ను మరింత మెత్తగా చేయడానికి పెరుగు, ఉప్పు, కారం, మసాలాలు, అల్లం-వెల్లుల్లి పేస్ట్‌తో కనీసం 30 నిమిషాలు మారినేట్ చేయవచ్చు. పెరుగులోని ఆమ్లత్వం మాంసం మెత్తబడటానికి సహాయపడుతుంది. అలాగే పచ్చి బొప్పాయి పేస్ట్‌లో ఉండే సహజ ఎంజైములు మాంసంలోని ప్రోటీన్లను విచ్ఛిన్నం చేయడంలో సహాయపడటంతో మటన్ త్వరగా మెత్తబడుతుంది. బొప్పాయి పేస్ట్‌ను మాత్రం తక్కువ పరిమాణంలో ఉపయోగించడం మంచిది.