శివకార్తికేయన్ మూవీకి బిగ్ యాక్షన్!

శివకార్తికేయన్, భాగ్యశ్రీ బోర్సే జంటగా నటిస్తున్న తాజా చిత్రం ‘సెయాన్’. శివకుమార్ మురుగేశన్ దర్శకత్వంలో తెరకెక్కుతున్న ఈ రూరల్ కమర్షియల్ యాక్షన్ ఎంటర్‌టైనర్‌ను రాజ్‌కమల్ ఫిలిమ్స్ ఇంటర్నేషనల్, టర్మరిక్ మీడియా బ్యానర్లపై కమల్ హాసన్, మహేంద్రన్ నిర్మిస్తున్నారు. ప్రస్తుతం శరవేగంగా షూటింగ్ జరుగుతుండగా, వచ్చే వారం నుంచి కొత్త షెడ్యూల్ ప్రారంభం కానున్నట్లు సమాచారం. ఈ షెడ్యూల్‌లో సినిమాకు కీలకమైన భారీ యాక్షన్ సన్నివేశాలను చిత్రీకరించేందుకు మేకర్స్ సిద్ధమవుతున్నట్లు తెలుస్తోంది.

ఈ యాక్షన్ సన్నివేశాలకు ప్రముఖ స్టంట్ మాస్టర్స్ అన్బరివ్ కొరియోగ్రఫీ చేయనున్నట్లు సమాచారం. సాధారణ రూరల్ బ్యాక్‌డ్రాప్ సినిమాల్లో కనిపించే ఫైట్స్‌కు భిన్నంగా, ‘సెయాన్’లో యాక్షన్ సీక్వెన్స్‌లను వినూత్నంగా, గ్రాండ్ స్కేల్‌లో రూపొందిస్తున్నట్లు తెలుస్తోంది. మాస్ ఎలిమెంట్స్‌తో పాటు రియలిస్టిక్ ట్రీట్‌మెంట్‌కు ప్రాధాన్యత ఇస్తున్నారని సమాచారం. శివకార్తికేయన్‌పై తెరకెక్కనున్న ఈ భారీ యాక్షన్ సీన్లు సినిమాకు ప్రత్యేక ఆకర్షణగా నిలుస్తాయని, తాజా అప్‌డేట్‌తో అభిమానుల్లో అంచనాలు మరింత పెరిగాయని చిత్ర వర్గాలు చెబుతున్నాయి.