‘కాకా’ మూవీ షూటింగ్ అప్‌డేట్ ఇచ్చిన మెగాస్టార్!

మెగాస్టార్ చిరంజీవి, దర్శకుడు బాబీ కాంబినేషన్‌లో తెరకెక్కుతున్న మాస్ యాక్షన్ ఎంటర్‌టైనర్ ‘కాకా’ షూటింగ్‌పై చిరంజీవి కీలక అప్‌డేట్‌ ఇచ్చారు. ‘సిగ్మా’ ప్రీ-రిలీజ్ వేడుకలో పాల్గొన్న ఆయన.. సినిమా ఫస్ట్ హాఫ్ చిత్రీకరణ పూర్తయిందని, సెకండాఫ్‌లో ఇప్పటికే 30 శాతం షూటింగ్‌ పూర్తైనట్లు వెల్లడించారు. అంతేకాకుండా సంగీత దర్శకుడు తమన్‌ మొదటి భాగానికి సంబంధించిన రీ-రికార్డింగ్‌ పనులను ప్రారంభించారని తెలిపారు. సినిమా అవుట్‌పుట్‌ చాలా బాగా వస్తోందని, దీనిపై పూర్తి నమ్మకంతో ఉన్నట్లు చిరంజీవి పేర్కొన్నారు.

‘వాల్తేరు వీరయ్య’ తర్వాత చిరంజీవి, బాబీ కలిసి చేస్తున్న రెండో సినిమా కావడంతో ‘కాకా’పై భారీ అంచనాలు నెలకొన్నాయి. కేవీఎన్ ప్రొడక్షన్స్‌ బ్యానర్‌పై కె. వెంకట నారాయణ నిర్మిస్తున్న ఈ చిత్రాన్ని వచ్చే ఏడాది జనవరి 13న సంక్రాంతి కానుకగా ప్రపంచవ్యాప్తంగా విడుదల చేసేందుకు చిత్రబృందం సన్నాహాలు చేస్తోంది. అనశ్వర రాజన్‌, నివేథా పేతురాజ్‌, సునీల్‌, గెటప్ శ్రీను తదితరులు కీలక పాత్రల్లో నటిస్తున్నారు.