డాన్సర్స్ అసోసియేషన్ అధ్యక్షురాలు సుమలతపై దాడి

తెలుగు ఫిల్మ్ అండ్ టీవీ డాన్సర్స్ అండ్ డాన్స్ డైరెక్టర్స్ అసోసియేషన్ సర్వసభ్య సమావేశంలో తీవ్ర ఉద్రిక్తత చోటుచేసుకున్నట్లు సమాచారం. అసోసియేషన్ అధ్యక్షురాలు వి. వి. సుమలతా దేవి తనపై కొందరు భౌతిక దాడికి పాల్పడి, హత్య చేస్తామని బెదిరించారని ఆరోపిస్తూ బంజారాహిల్స్ పోలీసులకు ఫిర్యాదు చేశారు. ఇందిరానగర్‌లోని రాఘవ గెస్ట్ హౌస్‌లో జరిగిన సర్వసభ్య సమావేశంలో ఈ ఘటన చోటుచేసుకున్నట్లు ఆమె ఫిర్యాదులో పేర్కొన్నారు.

సమావేశాన్ని అడ్డుకోవడంతో పాటు అసోసియేషన్‌కు సంబంధించిన ముఖ్యమైన రికార్డులను అక్రమంగా తీసుకెళ్లేందుకు కొందరు ముందస్తు ప్రణాళికతో వ్యవహరించారని సుమలతా దేవి ఆరోపించారు. అధ్యక్ష పదవికి రాజీనామా చేయకపోతే చంపేస్తామని కొందరు బెదిరించినట్లు తెలిపారు. తనకు, తన కుటుంబ సభ్యులకు ప్రాణహాని ఉందని పేర్కొంటూ పోలీసుల రక్షణ కోరారు. ఘటనకు సంబంధించిన వాస్తవాలను నిర్ధారించేందుకు సీసీటీవీ రికార్డులను పరిశీలించాలని పోలీసులను కోరారు.