ఇమ్రాన్ హష్మీ, జెనీలియా ‘గన్‌మాస్టర్’ ట్రైలర్ డేట్ ఫిక్స్

బాలీవుడ్ స్టార్ హీరో ఇమ్రాన్ హష్మీ, జెనీలియా దేశ్‌ముఖ్ ప్రధాన పాత్రల్లో నటిస్తున్న యాక్షన్ ఎంటర్‌టైనర్ ‘గన్‌మాస్టర్’ ప్రేక్షకుల ముందుకు వచ్చేందుకు సిద్ధమవుతోంది. ఆదిత్య దత్ దర్శకత్వంలో వాస్తవ సంఘటనల ఆధారంగా ఈ సినిమా తెరకెక్కుతోంది. ఇందులో అపర్‌శక్తి ఖురానా, అభిషేక్ సింగ్ కీలక పాత్రలు పోషిస్తున్నారు. ఎస్‌ఆర్ఈ స్టూడియో, ఎల్ఎల్‌పి బ్యానర్లపై దీపక్ ముకుత్, హునార్, సంగీతా అహిర్ ఈ చిత్రాన్ని నిర్మిస్తున్నారు. సోహమ్ రాక్‌స్టార్ ఎంటర్‌టైన్‌మెంట్ ప్రైవేట్ లిమిటెడ్ సమర్పిస్తున్న ఈ సినిమా నవంబర్ 27న ప్రపంచవ్యాప్తంగా థియేటర్లలో విడుదల కానుంది.

విడుదల తేదీ దగ్గరపడుతుండటంతో చిత్ర బృందం ప్రమోషన్లను వేగవంతం చేసింది. ఇందులో భాగంగా హీరో ఇమ్రాన్ హష్మీ సినిమా ట్రైలర్ విడుదల తేదీని అధికారికంగా ప్రకటించారు. నవంబర్ 11న ‘గన్‌మాస్టర్’ ట్రైలర్‌ను విడుదల చేయనున్నట్లు వెల్లడించారు. ఈ సందర్భంగా సినిమాకు సంబంధించిన ప్రత్యేక క్యాప్షన్‌తో పాటు జెనీలియాతో కలిసి ఉన్న రొమాంటిక్ పోస్టర్‌ను పంచుకున్నారు. ఈ పోస్టర్ ప్రస్తుతం ప్రేక్షకుల దృష్టిని ఆకర్షిస్తోంది. ఇమ్రాన్, జెనీలియా జోడీపై ఆసక్తి పెరగడంతో సినిమాపై అంచనాలు మరింత పెరిగాయి.