తోటి నటుడికి DC హీరోయిన్ వామికా గబ్బి ఖరీదైన గిఫ్ట్!

‘డీసీ’ సినిమా బాక్సాఫీస్‌ వద్ద మంచి విజయాన్ని అందుకుంటూ రూ.50 కోట్ల క్లబ్‌లోకి చేరినట్లు సమాచారం. సినిమా సక్సెస్‌తో పాటు హీరోయిన్‌ వామికా గబ్బి కూడా ఇప్పుడు వార్తల్లో నిలుస్తోంది. తనతో కలిసి నటించిన ఓ సహాయక నటుడిపై ఆమె చూపించిన ఆప్యాయత నెటిజన్ల ప్రశంసలు అందుకుంటోంది.

‘డీసీ’లో కీలక పాత్రలో నటించిన జవహర్‌ శక్తి.. షూటింగ్‌ సమయంలో వామికా గబ్బితో మంచి అనుబంధం ఏర్పడిందని ఓ ఇంటర్వ్యూలో తెలిపారు. ఈ క్రమంలో ఆమె తనకు ఐఫోన్‌ 17 ప్రో మ్యాక్స్‌ మొబైల్‌ను గిఫ్ట్‌గా ఇచ్చిందని వెల్లడించారు. ఈ విషయం సోషల్‌ మీడియాలో వైరల్‌గా మారడంతో తోటి నటుడిపై వామికా చూపించిన ప్రేమ, ఆప్యాయతను నెటిజన్లు మెచ్చుకుంటున్నారు.

వామికా గబ్బి తెలుగు ప్రేక్షకులకు కూడా పరిచయమే. 2015లో విడుదలైన ‘భలే మంచి రోజు’ సినిమాతో తెలుగు చిత్ర పరిశ్రమలోకి అడుగుపెట్టింది. ఆ తర్వాత పలు సినిమాల్లో నటించినా ఆశించిన స్థాయిలో గుర్తింపు రాలేదు. అయితే ‘డీసీ’తో ఆమెకు మంచి క్రేజ్‌ వచ్చింది. ప్రస్తుతం అడివి శేష్‌ నటిస్తున్న ‘గూఢచారి 2’లో హీరోయిన్‌గా నటిస్తోంది. అలాగే రిషభ్‌ శెట్టి ‘జై హనుమాన్‌’లోనూ కీలక పాత్ర కోసం ఆమెను తీసుకునే ఆలోచనలో చిత్రబృందం ఉన్నట్లు టాక్‌ వినిపిస్తోంది.