‘స్పిరిట్‌’ నుంచి తప్పుకోవడంపై దీపిక రియాక్షన్ వైరల్

ప్రభాస్‌ హీరోగా సందీప్ రెడ్డి వంగా దర్శకత్వంలో తెరకెక్కుతున్న హైఓల్టేజ్ యాక్షన్ థ్రిల్లర్ ‘స్పిరిట్‌’ మరోసారి వార్తల్లో నిలిచింది. ఈ సినిమాలో మొదట దీపికా పదుకొణెను హీరోయిన్‌గా ఎంపిక చేయగా, ఆమె ప్రాజెక్ట్ నుంచి తప్పుకోవడంపై అప్పట్లో పెద్ద ఎత్తున చర్చ జరిగింది. తాజాగా సందీప్ వంగా సోదరుడు ప్రణయ్ వంగా చేసిన వ్యాఖ్యలతో ఈ అంశం మరోసారి హాట్ టాపిక్‌గా మారింది.

దీపిక డేట్స్ సర్దుబాటు చేయడం, భారీ పారితోషికం కోరడంతో పాటు సినిమా లాభాల్లో 10 శాతం వాటా అడిగినట్లు ప్రణయ్ వంగా పేర్కొన్నట్లు సమాచారం. ఈ వ్యాఖ్యలపై సోషల్ మీడియాలో విస్తృతంగా చర్చ జరుగుతోంది. తాజాగా ఓ నెటిజన్‌ దీపికకు మద్దతుగా పెట్టిన ఇన్‌స్టాగ్రామ్ పోస్ట్‌ను ఆమె లైక్ చేయడంతో, ఆమె ఈ వివాదంపై పరోక్షంగా స్పందించినట్లు భావిస్తున్నారు.

‘స్పిరిట్‌’ కోసం దర్శకుడు సందీప్ రెడ్డి వంగా దీపికతో సుమారు ఏడాదిన్నర పాటు పనిచేసినట్లు తెలుస్తోంది. అయితే అనంతరం ఆమె స్థానంలో త్రిప్తి దిమ్రీని తీసుకున్నారు. ఈ క్రమంలో సినిమా కథను దీపిక లీక్ చేశారనే ఆరోపణలు కూడా అప్పట్లో వినిపించాయి.