'ది గర్ల్‌ఫ్రెండ్’ కథ వెనుక అసలు ఉద్దేశం ఇదే - రాహుల్

సోషల్ మీడియాలో ఓ నెటిజన్ పురుషులపై మహిళలు చేసే నేరాల నేపథ్యంతో సినిమా తీయాలని దర్శకుడు రాహుల్‌ను కోరగా, ఆయన ఆ వ్యాఖ్యలపై స్పందించారు. సమాజంలో మహిళలపై వ్యవస్థాగతంగా జరుగుతున్న వివక్ష, ఒత్తిడి మరియు వారి గుర్తింపును దెబ్బతీసే పరిస్థితులే తనకు ఎక్కువగా కనిపిస్తున్నాయని చెప్పారు. అందుకే ‘ది గర్ల్‌ఫ్రెండ్’ సినిమా ద్వారా అదే అంశాన్ని ప్రస్తావించాలని ప్రయత్నించానని వివరించారు.

నెటిజన్ ప్రస్తావించిన ఘటనపై పూర్తి వివరాలు తెలుసుకున్న తర్వాత అవసరమైతే దానిపై సినిమా చేయొచ్చని, కానీ అది ఒక వ్యక్తిగత నేర ఘటన మాత్రమే అవుతుందని అన్నారు. అలాగే ‘ది గర్ల్‌ఫ్రెండ్’ చిత్రంలోని విక్రమ్ పాత్ర హంతకుడు కాదని, అందులో శారీరక హింస లేదని స్పష్టం చేశారు. ప్రేక్షకుల అభిప్రాయాలను గౌరవిస్తూ, ప్రతి విమర్శను స్వీకరించి ఆత్మపరిశీలన చేసుకుంటానని రాహుల్ తెలిపారు.