కేరళలో ‘హ్యాపీ’ రీ-రిలీజ్ సంచలనం..

ఐకాన్ స్టార్ అల్లు అర్జున్‌కు కేరళలో ఉన్న అభిమాన బలం మరోసారి స్పష్టమైంది. ఆయన నటించిన ‘హ్యాపీ’ చిత్రం మలయాళంలో ‘హ్యాపీ బీ హ్యాపీ’ పేరుతో రీ-రిలీజ్ కావడంతో ప్రేక్షకుల నుంచి అద్భుత స్పందన లభిస్తోంది. పుష్పకు ముందే ఆర్య, హ్యాపీ, బన్నీ, దేశముదురు వంటి చిత్రాల డబ్బింగ్ వెర్షన్ల ద్వారా మల్లూవుడ్ ప్రేక్షకుల మనసులు గెలుచుకున్న అల్లు అర్జున్, రెండు దశాబ్దాలుగా అక్కడ ప్రత్యేకమైన అభిమాన వర్గాన్ని ఏర్పరచుకున్నారు.

రీ-రిలీజ్ సందర్భంగా కేరళలోని అనేక థియేటర్లు అభిమానులతో కిక్కిరిసిపోయాయి. స్క్రీన్ ముందు డ్యాన్సులు, ఈలలు, సంబరాలతో అభిమానులు పండుగ వాతావరణాన్ని సృష్టించారు. అల్లు అర్జున్ కామెడీ టైమింగ్, స్టైలిష్ మేనరిజమ్స్, ఎనర్జిటిక్ స్క్రీన్ ప్రెజెన్స్‌కు ప్రేక్షకులు విశేషంగా స్పందించారు. మలయాళ సినీ పరిశ్రమలోని పలువురు యువ నటులు, టెక్నీషియన్లు కూడా తాము చిన్నప్పటి నుంచి అల్లు అర్జున్ సినిమాల నుంచి స్ఫూర్తి పొందినట్లు పలుమార్లు వెల్లడించడం ఆయన ప్రభావాన్ని మరింత స్పష్టంగా చూపిస్తోంది.