ప్రభాస్‌ ‘బాహుబలి’పై ఇరాన్‌ కాన్సులేట్‌ ఆసక్తికర పోస్ట్‌

ప్రభాస్‌ నటించిన ‘బాహుబలి’ చిత్రంలోని అమరేంద్ర బాహుబలి పోరాట సన్నివేశం మరోసారి చర్చనీయాంశంగా మారింది. ఐక్యరాజ్యసమితి సర్వసభ్య సమావేశంలో ఇరాన్‌ అధ్యక్షుడు మసూద్‌ పెజెష్కియాన్‌ ప్రసంగం అనంతరం హైదరాబాద్‌లోని ఇరాన్‌ కాన్సులేట్‌ ‘బాహుబలి’లోని పోరాట సన్నివేశాన్ని సామాజిక మాధ్యమాల్లో పంచుకుంది. ఈ సన్నివేశానికి సంబంధించిన చిత్రాన్ని ప్రస్తావిస్తూ ఆసక్తికరమైన వ్యాఖ్య చేసింది.

ప్రతికూల పరిస్థితులను ఎదుర్కొంటూ అమరేంద్ర బాహుబలి పోరాడే సన్నివేశాన్ని ఇరాన్‌ వైఖరితో పోలుస్తూ కాన్సులేట్‌ ఈ పోస్టును రూపొందించింది. ఈ పోలికతో ప్రభాస్‌ అభిమానుల్లో ఆసక్తి నెలకొంది. ఎస్‌.ఎస్‌. రాజమౌళి దర్శకత్వంలో తెరకెక్కిన ‘బాహుబలి: ది బిగినింగ్’, ‘బాహుబలి: ది కన్‌క్లూజన్’ చిత్రాలు ప్రభాస్‌కు అంతర్జాతీయ స్థాయిలో గుర్తింపు తీసుకొచ్చిన విషయం తెలిసిందే. ఇరాన్‌ కాన్సులేట్‌ చేసిన ఈ ప్రస్తావనతో మరోసారి ‘బాహుబలి’ సన్నివేశం వార్తల్లో నిలిచింది.