రాజమౌళి విజయ రహస్యం ఇదేనా?

చిన్న స్థాయిలో తెరకెక్కించే సినిమాకైనా నిర్మాణ ప్రక్రియను ఎంతో విస్తృతంగా, పక్కా ప్రణాళికతో నిర్వహించడం రాజమౌళి నుంచి నేర్చుకున్న ముఖ్యమైన విషయమని కార్తికేయ, శోబు తెలిపారు. ఓ సినిమా కోసం ఏకంగా 79 ప్రాంతాలను వినియోగించిన విషయాన్ని వారు వెల్లడించారు. చిత్రీకరణ ప్రారంభానికి ముందే సుదీర్ఘంగా ప్రీ-ప్రొడక్షన్‌ పనులు నిర్వహించామని, ప్రతి సన్నివేశాన్ని తెరపై ప్రభావవంతంగా చూపించేందుకు ముందస్తు కసరత్తుకు అధిక ప్రాధాన్యం ఇచ్చామని చెప్పారు.

ప్రతి సన్నివేశంపై ముందస్తు సిద్ధత, క్రమశిక్షణ, స్పష్టమైన కమ్యూనికేషన్‌, ఆలోచనల్లో ఖచ్చితత్వం అవసరమని కార్తికేయ, శోబు పేర్కొన్నారు. చిత్రీకరణ పూర్తయిన తర్వాత కూడా దాదాపు ఆరు నెలల పాటు పోస్ట్‌ ప్రొడక్షన్‌ పనులు కొనసాగినట్టు తెలిపారు. తెరపై కనిపించే భారీ దృశ్యాల వెనుక విస్తృతమైన ప్రణాళిక, ప్రతి విభాగం మధ్య సమన్వయం ఉంటుందని వివరించారు. దృశ్య వైభవం మాత్రమే కాకుండా, నిర్మాణ ప్రక్రియపై చూపించే శ్రద్ధ కూడా సినిమా ఫలితంపై ప్రభావం చూపుతుందని వారు పేర్కొన్నారు.