కీర్తిసురేశ్‌ కొత్త మూవీ రిలీజ్‌కు మలేషియాలో బ్రేక్...

వైవిధ్యమైన కథలు, పాత్రలను ఎంచుకుంటూ ముందుకు సాగుతున్న కథానాయిక కీర్తి సురేశ్‌ నటించిన తాజా తమిళ చిత్రం ‘డోరతి’ ప్రస్తుతం చర్చనీయాంశంగా మారింది. కార్తిక్‌ సుబ్బరాజ్‌ దర్శకత్వం వహించిన ఈ చిత్రంలో సనంత్‌, రిషికాంత్‌ కీలక పాత్రల్లో నటించారు. 1990ల నాటి గ్రామీణ నేపథ్యంలో సాగే ఈ కథలో స్నేహం, ఆశలు, సామాజిక వివక్ష వంటి అంశాలను ప్రధానంగా చూపించారు. టొరంటో అంతర్జాతీయ చలనచిత్రోత్సవంలో ప్రదర్శితమైన ఈ చిత్రం తాజాగా తమిళంలో విడుదలైంది. విమర్శకుల నుంచి సానుకూల స్పందన వచ్చినప్పటికీ.. సోషల్ మీడియాలో మాత్రం సినిమాపై చర్చ, ట్రోలింగ్‌ జరుగుతోంది.

ఎల్‌జీబీటీక్యూ నేపథ్యంతో రూపొందిన ఈ చిత్రంలో సుబ్బు, కార్తి పాత్రల మధ్య సంబంధాన్ని భావోద్వేగ కోణంలో చూపించారు. కథ చివర్లో లింగ మార్పు అనంతరం ఒక పాత్రకు మరో పాత్ర ముద్దు ఇవ్వడం ప్రస్తుతం సోషల్ మీడియాలో ప్రధాన చర్చగా మారింది. ఎల్‌జీబీటీక్యూ కథాంశాలున్న చిత్రాలకు మలేషియాలో అనుమతులు లభించకపోవడంతో ‘డోరతి’ ప్రదర్శనకు అక్కడ అనుమతి ఇవ్వలేదని సమాచారం. ‘పిజ్జా’, ‘జిగర్తాండ’, ‘పేట’, ‘రెట్రో’ వంటి విభిన్న చిత్రాలను తెరకెక్కించిన కార్తిక్‌ సుబ్బరాజ్‌ ఈ సినిమాను కూడా ప్రత్యేకమైన కథాంశంతో రూపొందించారు. ఈ చిత్రానికి ప్రముఖ సంగీత దర్శకుడు ఇళయరాజా సంగీతం అందించారు.