ఓవర్సీస్‌లో దూసుకెళ్తున్న ‘కొరియన్ కనకరాజు'

మెగా ప్రిన్స్‌ వరుణ్‌ తేజ్‌ నటించిన ‘కొరియన్ కనకరాజు’ సినిమా ఓవర్సీస్‌లోనూ మంచి స్పందనను అందుకుంటోంది. గాంధీ మేర్లపాక దర్శకత్వంలో తెరకెక్కిన ఈ కామెడీ థ్రిల్లర్‌ దేశీయ బాక్సాఫీస్‌తో పాటు విదేశీ మార్కెట్‌లోనూ వసూళ్ల పరంగా ముందుకు సాగుతోంది. ముఖ్యంగా అమెరికాలో సినిమాకు ప్రేక్షకుల నుంచి ఆదరణ లభిస్తోంది. ఇప్పటికే అక్కడ 200K డాలర్లకు పైగా వసూళ్లు సాధించడంతో, రానున్న రోజుల్లో మరింత మెరుగైన వసూళ్లు నమోదవుతాయని చిత్ర బృందం ఆశిస్తోంది.

ఓవర్సీస్‌ విడుదల బాధ్యతలను శ్లోకా ఎంటర్‌టైన్‌మెంట్స్‌ నిర్వహిస్తోంది. రితిక నాయక్‌ కథానాయికగా నటించిన ఈ చిత్రానికి థమన్‌ సంగీతం అందించారు. యూవీ క్రియేషన్స్‌ నిర్మించిన ఈ చిత్రానికి కథ, వినోదం, సంగీతం ఆకర్షణగా నిలుస్తున్నాయి. అమెరికాలో ప్రేక్షకుల ఆదరణ కొనసాగుతుండటంతో సినిమా మరిన్ని కీలక మైలురాళ్లు అందుకునే అవకాశం ఉందని చిత్ర వర్గాలు భావిస్తున్నాయి.