ప్యారడైస్‌ రెస్పాన్స్‌పై నాని ఓపెన్‌ కామెంట్స్

‘ప్యారడైస్‌’ సినిమాకు ప్రతి షోతో ప్రేక్షకుల నుంచి ఆదరణ పెరుగుతోందని నేచురల్‌ స్టార్‌ నాని తెలిపారు. సినిమా విజయంపై నిర్వహించిన మీడియా ములాఖాత్‌లో నాని మాట్లాడుతూ.. ‘ప్యారడైస్‌’కు వస్తున్న స్పందన తనకు ఎంతో కొత్త అనుభవంగా ఉందన్నారు. సాధారణంగా సినిమా విడుదలైన ఉదయం పాజిటివ్‌ రెస్పాన్స్‌ వచ్చి, సాయంత్రానికి మిశ్రమ స్పందనగా మారుతుందని, కానీ ఈ సినిమాకు అందుకు భిన్నంగా ప్రతి షోతో పాజిటివిటీ పెరుగుతోందని చెప్పారు. ప్రేక్షకులు సినిమాను తమ సొంత చిత్రంగా భావించి చిన్న చిన్న సన్నివేశాలను కూడా ఆస్వాదిస్తూ వేడుక చేసుకుంటున్నారని, ఇందుకు తెలుగు ప్రేక్షకులకు ఎప్పటికీ రుణపడి ఉంటానని తెలిపారు. కీలక పాత్రలో నటించిన మోహన్‌ బాబు కూడా ‘ప్యారడైస్‌’ సూపర్‌ డూపర్‌ హిట్‌ అయిందని, నాని ఎంతో కష్టపడ్డారని ప్రశంసించారు.

శ్రీకాంత్‌ ఓదెల దర్శకత్వంలో, సుధాకర్‌ చెరుకూరి నిర్మించిన ‘ప్యారడైస్‌’ సెప్టెంబర్‌ 24న ప్రపంచవ్యాప్తంగా విడుదలైంది. మోహన్‌ బాబు దర్శకుడు శ్రీకాంత్‌ ఓదెల ప్రతిభను ప్రశంసిస్తూ, తన పాత్రను ఎంతో భిన్నంగా మలిచారని చెప్పారు. నాని కూడా నటీనటులు, సాంకేతిక నిపుణులు, నిర్మాణ బృందం కృషిని ప్రత్యేకంగా అభినందించారు. అనిరుద్‌ సంగీతం, సాయి నవీన్‌ కెమెరా పనితనం, అవినాష్‌ కళా నిర్మాణం, స్టంట్‌ మరియు నృత్య కొరియోగ్రాఫర్ల కృషిని ప్రస్తావించారు. ప్రియదర్శి, సంపూర్ణేష్‌ బాబు తదితరులు కూడా తమ పాత్రలకు వస్తున్న స్పందనపై సంతోషం వ్యక్తం చేస్తూ ప్రేక్షకులకు కృతజ్ఞతలు తెలిపారు.