కొత్త ప్రయాణానికి శ్రీకారం చుట్టిన నార్నె నితిన్

‘మ్యాడ్’, ‘మ్యాడ్ స్క్వేర్’, ‘ఆయ్’ వంటి విజయవంతమైన చిత్రాలతో ప్రేక్షకుల ఆదరణ పొందిన యువ హీరో నార్నె నితిన్ తన పుట్టినరోజు సందర్భంగా తన ఐదో చిత్రాన్ని అధికారికంగా ప్రకటించారు. పెళ్లి తర్వాత కొంత విరామం తీసుకున్న ఆయన ఇప్పుడు కొత్త ఉత్సాహంతో మరో ప్రాజెక్ట్‌తో ప్రేక్షకుల ముందుకు రానున్నారు. ప్రస్తుతం NN-5 అనే వర్కింగ్ టైటిల్‌తో రూపొందుతున్న ఈ చిత్రానికి రాధా కృష్ణ రెడ్డి దర్శకత్వం వహిస్తుండగా, ప్రముఖ నిర్మాణ సంస్థ KVN ప్రొడక్షన్స్ బ్యానర్‌పై వెంకట్ కె. నారాయణ నిర్మిస్తున్నారు.

సినిమా ప్రకటన కోసం విడుదల చేసిన పోస్టర్ మరియు నార్నె నితిన్ షేర్ చేసిన రొమాంటిక్ క్యాప్షన్ సోషల్ మీడియాలో వైరల్ అవుతున్నాయి. “ఆకాశంలో ఉంటది మూన్.. నువ్వు నా జీవితానికి క్వీన్” అనే ఆసక్తికరమైన ట్యాగ్‌లైన్‌తో విడుదలైన పోస్టర్ అభిమానులను ఆకట్టుకుంటోంది. అయితే సినిమాలో హీరోయిన్‌గా ఎవరు నటిస్తారన్న విషయాన్ని మేకర్స్ సస్పెన్స్‌గా ఉంచడంతో ప్రేక్షకుల్లో మరింత ఆసక్తి నెలకొంది.