నయన్ కొత్త టార్గెట్?

దక్షిణాది చిత్రసీమలో తనదైన ముద్ర వేసుకున్న నయనతార ఇప్పుడు హిందీ ప్రేక్షకుల దృష్టినీ ఆకర్షిస్తోంది. కథానాయికగా ఎన్నో విజయాలను అందుకున్న ఆమె, ప్రస్తుతం వరుస భారీ ప్రాజెక్టులతో బిజీగా మారింది. ఒకవైపు యశ్ నటిస్తున్న ‘టాక్సిక్’ చిత్రంలో కీలక పాత్ర పోషిస్తుండగా, మరోవైపు సల్మాన్ ఖాన్ సరసన నటించే అవకాశాన్ని అందుకుంది. తెలుగు దర్శకుడు వంశీ పైడిపల్లి తెరకెక్కిస్తున్న ఈ ప్రతిష్ఠాత్మక చిత్రంలో ఆమె పాత్రకు విశేష ప్రాధాన్యం ఉన్నట్లు సినీ వర్గాల్లో చర్చ సాగుతోంది.ఈ కథలో నయనతార పాత్ర కేవలం కథానాయికగా మాత్రమే కాకుండా కథను ముందుకు నడిపించే కీలక శక్తిగా నిలవనుందని సమాచారం.

ముఖ్యంగా యాక్షన్ ఎపిసోడ్స్‌లోనూ ఆమెకు గణనీయమైన స్థానం కల్పించినట్లు తెలుస్తోంది. ఇప్పటికే షారుఖ్ ఖాన్‌తో చేసిన ‘జవాన్’ ద్వారా ఉత్తరాదిలో మంచి గుర్తింపు తెచ్చుకున్న నయన్, మరోసారి అదే తరహా బలమైన పాత్రను ఎంచుకోవడం ఆసక్తిని పెంచుతోంది. గ్లామర్‌కు మాత్రమే పరిమితం కాకుండా నటనకు ప్రాధాన్యం ఉన్న పాత్రలకే ఆమె ఎక్కువ ప్రాధాన్యత ఇస్తుండటం విశేషం. అందుకే దర్శక నిర్మాతలు కూడా ఆమెను ప్రత్యేకంగా సంప్రదిస్తున్నారనే టాక్ వినిపిస్తోంది. ప్రస్తుతం ప్రీ-ప్రొడక్షన్ దశలో ఉన్న ఈ చిత్రం వచ్చే ఏడాది ఈద్ సందర్భంగా ప్రేక్షకుల ముందుకు రావచ్చని సమాచారం. దీంతో బాలీవుడ్‌లో నయనతార స్థానం మరింత బలపడే అవకాశాలు కనిపిస్తున్నాయి.