శోభిత ధూళిపాళ్లపై దర్శకుడు పా. రంజిత్ ప్రశంసల వర్షం..

దర్శకుడు పా. రంజిత్ తెరకెక్కిస్తున్న ‘వెట్టువం’లో శోభిత ధూళిపాళ్ల అంకితభావాన్ని ఆయన ప్రత్యేకంగా ప్రశంసించారు. ఈ సినిమాలోని యాక్షన్ సన్నివేశాలను అసలు షూటింగ్ సమయంలో శోభిత ఎలాంటి స్టంట్ డబుల్ సాయం లేకుండా స్వయంగా చేసినట్లు పా. రంజిత్ వెల్లడించారు. కెమెరా రిహార్సల్స్ సమయంలో మాత్రమే డూప్ లేదా స్టంట్ డబుల్స్‌ను ఉపయోగించామని, అసలు షాట్ ప్రారంభమైనప్పుడు శోభిత స్వయంగా యాక్షన్ సన్నివేశాలు చేసేవారని తెలిపారు. కథలో సహజత్వం, రియలిస్టిక్ ఫీల్ కోసం ఆమె తన వంద శాతం శ్రమించారని రంజిత్ పేర్కొన్నారు.

ఈ యాక్షన్ కొరియోగ్రఫీ కోసం తాను ఎంతో కష్టపడ్డానని శోభిత ధూళిపాళ్ల తెలిపారు. సినిమాలోని కొన్ని మార్షల్ ఆర్ట్స్ మూమెంట్స్‌ను నేర్చుకోవడానికి సాధారణంగా 15 నుంచి 20 ఏళ్ల సాధన అవసరమయ్యేంత క్లిష్టంగా ఉన్నాయని చెప్పారు. అయితే ప్రతి షూటింగ్ రోజూ చిత్రబృందం అందించిన సహకారం, టీమ్‌వర్క్‌తో ఆ సన్నివేశాలను పూర్తి చేయగలిగానని పేర్కొన్నారు. తాజాగా విడుదలైన ‘వరల్డ్ ఆఫ్ వెట్టువం’ గ్లింప్స్‌ ఈ సినిమాను మూడు కాలపరిమాణాల్లో సాగే యాక్షన్, సైన్స్ ఫిక్షన్ కథగా పరిచయం చేసింది. ఆర్య, వీఆర్ దినేష్, శోభిత ధూళిపాళ్ల ప్రధాన పాత్రల్లో నటిస్తున్న ఈ చిత్రం డిసెంబర్ 2026లో ప్రపంచవ్యాప్తంగా థియేటర్లలో విడుదల కానుంది. సంగీతం జి.వి. ప్రకాష్ కుమార్ అందిస్తున్నారు.