బాక్సాఫీస్ వద్ద ‘పెద్ది’ జోరు.. చివరి లెక్కల్లో ట్విస్ట్!

మెగా పవర్ స్టార్ రామ్ చరణ్, జాన్వీ కపూర్ జంటగా బుచ్చిబాబు సానా దర్శకత్వంలో తెరకెక్కిన ఎమోషనల్ స్పోర్ట్స్ డ్రామా ‘పెద్ది’ విజయవంతమైన బాక్సాఫీస్ ప్రయాణాన్ని కొనసాగిస్తోంది. జూన్ 4న విడుదలైన ఈ చిత్రం ప్రారంభంలో మిశ్రమ స్పందన పొందినా, కలెక్షన్ల పరంగా భారీ విజయాన్ని నమోదు చేసింది. అయితే సినిమా థియేట్రికల్ రన్ చివరి దశకు చేరుకోవడంతో రూ.500 కోట్ల మార్క్‌ను అందుకోవడం కష్టమనే అభిప్రాయాలు ట్రేడ్ వర్గాల్లో వినిపిస్తున్నాయి.

మొదటి రోజే రూ.135 కోట్ల గ్రాస్ వసూళ్లు సాధించిన ‘పెద్ది’, అనంతరం రూ.400 కోట్ల క్లబ్‌లో చేరి రామ్ చరణ్ కెరీర్‌లో అతిపెద్ద సోలో హిట్లలో ఒకటిగా నిలిచింది. ప్రస్తుతం ఈ చిత్రం రూ.450 కోట్ల మార్క్ వైపు దూసుకెళ్తోంది. అయితే థియేట్రికల్ రన్ ముగింపుకు చేరుకోవడంతో రూ.500 కోట్ల క్లబ్‌లో చేరే అవకాశాలు తగ్గినట్లు ట్రేడ్ రిపోర్ట్స్ చెబుతున్నాయి. ఇదే సమయంలో ‘దేవర’ సినిమా రికార్డులతో పోలికలు కూడా సోషల్ మీడియాలో చర్చనీయాంశంగా మారాయి.