వినాయకుడి లడ్డూని రూ.కోటికి పాడిన రాజమౌళి

ఫహాద్‌ ఫాజిల్‌ హీరోగా నటించిన ‘డోంట్‌ ట్రబుల్‌ ది ట్రబుల్‌’ చిత్రం అక్టోబర్‌ 2న ప్రేక్షకుల ముందుకు రానుంది. శశాంక్‌ యేలేటి దర్శకత్వం వహించిన ఈ చిత్రాన్ని శోభు యార్లగడ్డ, ప్రసాద్‌ దేవినేని, ఎస్‌ఎస్‌ కార్తికేయ నిర్మించారు. సారా పాలేకర్‌, సౌరభ్‌ సచ్‌దేవా కీలక పాత్రల్లో నటించారు. వినాయక చవితి సందర్భంగా ఫహాద్‌ ఫాజిల్‌, సారా పాలేకర్‌ నిర్వహించిన ప్రత్యేక ఇంటర్వ్యూలో దర్శకుడు ఎస్‌ఎస్‌ రాజమౌళి, సంగీత దర్శకుడు ఎం.ఎం. కీరవాణి, ఎస్‌ఎస్‌ కార్తికేయ తదితరులు పాల్గొని సినిమా విశేషాలను పంచుకున్నారు.

ఇంటర్వ్యూ ముగింపులో వినాయకుడి లడ్డూ వేలం పాట నిర్వహించారు. ఈ వేలంలో రూ.కోటికి ఎస్‌ఎస్‌ రాజమౌళి లడ్డూను దక్కించుకున్నారు. ఇందుకు సంబంధించిన వీడియో ప్రస్తుతం సోషల్‌ మీడియాలో వైరల్‌గా మారింది. ‘డోంట్‌ ట్రబుల్‌ ది ట్రబుల్‌’ ఇప్పటికే చిత్రీకరణ పూర్తి చేసుకోగా, విడుదలకు సిద్ధమవుతోంది.