బాక్సాఫీస్ బరిలోకి దిగకముందే రామాయణం రికార్డుల వేట

ఎంతో ఆసక్తిగా ఎదురుచూస్తున్న రామాయణం: రైజ్ ఆఫ్ ఎ లెజెండ్ ప్రపంచవ్యాప్తంగా విడుదలకు సిద్ధమవుతోంది. రణ్‌బీర్ కపూర్, సాయి పల్లవి, యశ్ ప్రధాన పాత్రల్లో నటిస్తున్న ఈ భారీ చిత్రానికి నితేశ్ తివారీ దర్శకత్వం వహించగా, నమిత్ మల్హోత్రా నిర్మిస్తున్నారు. ఇప్పటికే పలు ప్రీమియర్ షోలు ప్రదర్శించగా, రాబోయే రెండు రోజుల్లో మరిన్ని ప్రదర్శనలు ప్లాన్ చేసినట్లు సమాచారం. అయితే నవంబర్ 4, 2026న సాధారణ ప్రేక్షకుల కోసం పెయిడ్ ప్రీమియర్ షోలు ఉంటాయా లేదా అన్నది ఇప్పుడు ఆసక్తికరంగా మారింది. ప్రత్యేక పెయిడ్ ప్రీమియర్లు నిర్వహించనున్నారనే ప్రచారం జరుగుతున్నప్పటికీ, చిత్ర బృందం నుంచి ఇప్పటివరకు అధికారిక ప్రకటన వెలువడలేదు. అంతేకాకుండా ఈ షోలకు సంబంధించిన టికెట్ బుకింగ్స్ కూడా ఇంకా ప్రారంభం కాలేదు. దీంతో అభిమానులు అధికారిక సమాచారం కోసం ఎదురుచూస్తున్నారు.

మరోవైపు, ఈ సినిమా తొలి రోజు వసూళ్లపై భారీ అంచనాలు నెలకొన్నాయి. అందిన సమాచారం ప్రకారం, ప్రపంచవ్యాప్తంగా అడ్వాన్స్ టికెట్ అమ్మకాల గ్రాస్ ఇప్పటికే రూ.100 కోట్లు దాటింది. భారీ తారాగణం, విజువల్‌ గ్రాండియర్‌, ఇతిహాస కథాంశంతో తెరకెక్కిన ఈ చిత్రం బాక్సాఫీస్ వద్ద ఎలాంటి ప్రభావం చూపుతుందనే ఆసక్తి నెలకొంది. పెయిడ్ ప్రీమియర్ షోలపై చిత్ర బృందం ఎప్పుడు స్పష్టత ఇస్తుందో, ప్రపంచవ్యాప్తంగా ఈ సినిమా ఎంతటి వసూళ్లు సాధిస్తుందో చూడాలి.