‘రామాయణ’ లుక్స్ వెనుక ఉన్న ఆలోచన ఇదే

రామాయణ ట్రైలర్ విడుదలైన తర్వాత ముఖ్యంగా సీత పాత్రలో సాయి పల్లవి, కైకేయిగా లారా దత్త లుక్స్‌తో పాటు కాస్ట్యూమ్స్‌పై సోషల్ మీడియాలో విస్తృత చర్చ జరిగింది. ఈ విమర్శలకు స్పందించిన కాస్ట్యూమ్ డిజైనర్లు రింపుల్, హర్‌ప్రీత్ ఇలాంటి స్పందనలు ముందే ఊహించామని తెలిపారు. శిల్పకళ, చారిత్రక చిత్రాలు, సాంస్కృతిక కళారూపాలు, రాజా రవి వర్మ చిత్రాల నుంచి స్ఫూర్తి పొంది తమ దుస్తులను రూపొందించామని, చరిత్రను యథాతథంగా పునర్నిర్మించడం కంటే భావాన్ని ప్రతిబింబించడమే తమ లక్ష్యమని వివరించారు.

ప్రతి రంగు, ప్రతి వస్త్రం వెనుక ప్రత్యేక ఉద్దేశం ఉందని హర్‌ప్రీత్ చెప్పారు. కైకేయి దుస్తుల్లోని ఆకుపచ్చ మాతృత్వాన్ని సూచిస్తే, ముదురు ఎరుపు ఆమె నిర్ణయాల్లోని అంతర్మథనాన్ని ప్రతిబింబిస్తుందని వివరించారు. ట్రైలర్ చూసి త్వరగా నిర్ణయాలు తీసుకోకుండా పూర్తి సినిమా చూసిన తర్వాతే అభిప్రాయం వ్యక్తం చేయాలని ప్రేక్షకులను కోరారు. నితీశ్ తివారీ దర్శకత్వంలో రూపొందుతున్న ఈ చిత్రంలో రణ్‌బీర్ కపూర్ రాముడిగా, సాయి పల్లవి సీతగా నటిస్తుండగా తొలి భాగం ఈ ఏడాది దీపావళికి విడుదల కానుంది.