సల్మాన్ ఖాన్ ‘మాతృభూమి’ ట్రైలర్ విడుదల

ఎన్నో అడ్డంకులను అధిగమించిన తర్వాత సల్మాన్ ఖాన్ ప్రధాన పాత్రలో నటించిన మాతృభూమి సినిమా విడుదలకు సిద్ధమైంది. ఈ చిత్రం డిసెంబర్ 4న ప్రపంచవ్యాప్తంగా థియేటర్లలో ప్రేక్షకుల ముందుకు రానుంది. విడుదలకు సమయం దగ్గరపడుతున్న నేపథ్యంలో చిత్రబృందం తాజాగా ట్రైలర్‌ను విడుదల చేసింది. ఇందులో సల్మాన్ ఖాన్ దేశ రక్షణ కోసం సరిహద్దులో పోరాడే సైనికుడిగా కనిపించడంతో పాటు, భార్యాపిల్లలతో ఆనందంగా జీవించే కుటుంబ వ్యక్తిగా కూడా అలరించనున్నారు. నటి చిత్రాంగదా సింగ్ ఈ సినిమాలో సల్మాన్ భార్య పాత్రను పోషించారు. సైనికుడిగా ఆయన ఎదుర్కొనే సవాళ్లతో పాటు కుటుంబంతో ఆయనకు ఉన్న అనుబంధాన్ని కూడా ట్రైలర్‌లో చూపించారు.

2020లో భారత్‌-చైనా సైనికుల మధ్య జరిగిన గల్వాన్ ఘర్షణల ఆధారంగా ఈ సినిమాను రూపొందించారు. తొలుత ఈ చిత్రానికి బ్యాటిల్ ఆఫ్ గల్వాన్ అనే టైటిల్‌ను ఖరారు చేయగా, ఆ తర్వాత మాతృభూమిగా మార్చుతున్నట్లు చిత్రబృందం ప్రకటించింది. భారత రక్షణ మంత్రిత్వ శాఖ సూచనల మేరకు దర్శకుడు అపూర్వ లఖియా సినిమాలో దాదాపు 40 శాతం భాగాన్ని మళ్లీ చిత్రీకరించినట్లు సమాచారం. కొత్త వెర్షన్‌లో కొన్ని కల్పిత అంశాలు, రొమాంటిక్ సన్నివేశాలు, పాత్రల నేపథ్యాన్ని వివరించే అదనపు కథాంశాన్ని చేర్చినట్లు తెలుస్తోంది. కథనాన్ని మరింత విస్తృతంగా రూపొందించేందుకు ఈ మార్పులు చేసినట్లు సమాచారం. తాజాగా ట్రైలర్ విడుదల కావడంతో గల్వాన్ ఘర్షణల నేపథ్యంలోని ఈ కథలో సల్మాన్ ఖాన్‌ను తెరపై చూసేందుకు ప్రేక్షకుల్లో ఆసక్తి నెలకొంది.