మెగాస్టార్‌పై సందీప్ కిషన్ ఎమోషనల్.. ఆ మాటలు వైరల్!

యంగ్ హీరో సందీప్ కిషన్ నటిస్తున్న తాజా చిత్రం ‘సిగ్మా’ గ్రాండ్ ప్రీరిలీజ్ ఈవెంట్‌ను ఘనంగా నిర్వహించారు. ఈ వేడుకకు మెగాస్టార్ చిరంజీవి ముఖ్య అతిథిగా హాజరయ్యారు. ఈ సందర్భంగా సందీప్ కిషన్ మాట్లాడుతూ చిరంజీవికి ప్రత్యేక కృతజ్ఞతలు తెలిపారు. తన కెరీర్ ప్రారంభం నుంచి చిరంజీవి తనకు అతిపెద్ద స్ఫూర్తి అని, తన సినిమా వేడుకకు ఆయన వచ్చి ఆశీర్వదించడం ఎంతో సంతోషంగా ఉందని భావోద్వేగంతో చెప్పారు.

దర్శకుడిగా పరిచయమవుతున్న జాసన్ సంజయ్‌పై కూడా సందీప్ ప్రశంసలు కురిపించారు. విజయ్ కుమారుడిగా ఆయనకు ప్రత్యేక గుర్తింపు ఉన్నప్పటికీ, తన సొంత కష్టంతో, స్పష్టమైన విజన్‌తో ‘సిగ్మా’ను తెరకెక్కించారని అన్నారు. ఈ సినిమా సరికొత్త తరహా హైస్ట్ యాక్షన్ థ్రిల్లర్‌గా ఉంటుందని, అద్భుతమైన విజువల్స్‌తో పాటు యాక్షన్ సన్నివేశాలు థియేటర్లలో ప్రేక్షకులకు మంచి అనుభూతిని అందిస్తాయని తెలిపారు. అక్టోబర్ 2న విడుదల కానున్న ఈ చిత్రాన్ని తెలుగు ప్రేక్షకులు ఆదరిస్తారని సందీప్ కిషన్ ఆశాభావం వ్యక్తం చేశారు.