చిన్మయి స్పందనపై సునీత క్లారిటీ.. వైరల్ వ్యాఖ్యలకు వివరణ

టాలీవుడ్ ప్రముఖ గాయని సునీత చేసిన వ్యాఖ్యలు సోషల్ మీడియాలో పెద్ద చర్చకు దారితీశాయి. తన వ్యాఖ్యలు మహిళలకు తప్పుదారి పట్టించేలా ఉన్నాయని గాయని చిన్మయి శ్రీపాద అభిప్రాయపడటంతో ఈ అంశం మరింత ప్రాధాన్యం సంతరించుకుంది. ఈ నేపథ్యంలో సునీత వీడియో విడుదల చేసి తన వ్యాఖ్యల ఉద్దేశాన్ని వివరించారు.

చిన్మయిపై తనకు ఎంతో గౌరవం ఉందని పేర్కొన్న సునీత, తన మాటలను తప్పుగా అర్థం చేసుకున్నారని చెప్పారు. "నా శరీరం.. నా ఇష్టం" అనే భావనకు తనకు పూర్తి అవగాహన ఉందని, ప్రతి వ్యక్తికి తన శరీరంపై పూర్తి హక్కు ఉంటుందని స్పష్టం చేశారు. తాను సమాజంలో ఉన్న వాస్తవ పరిస్థితులను మాత్రమే ప్రస్తావించానని, మహిళలపై హింస లేదా వేధింపులను ఎప్పటికీ సమర్థించబోనని తెలిపారు. తన పూర్తి వీడియోను చూస్తే తన వ్యాఖ్యల అసలు ఉద్దేశం అర్థమవుతుందని ఆమె పేర్కొన్నారు.